Ukraina flaggRedder Bibelen liv i Ukraina?
Finn ut mer
Gå til forsiden

Markusa evangelium

12

Viidnegárddi láigoheaddjit ja árbbolaš

1 Jesus sárdnugođii sidjiide veardádusaiguin: “Olmmái gilvvii viidnegárddi, áiddui dan, čuolai báktái viidnebohčingári ja huksii fáktentoartna. Dasto son láigohii gárddi láigoheddjiide ja fárrii ieš eret eatnamis. 2 Sohppojuvvon áigái son vuolggahii bálvaleaddjis láigoheddjiid lusa, vai oažžu sis iežas oasi viidnegárddi šattus. 3 Muhto sii dohppejedje olbmá, cábme su ja bidje su mannat ruoktot guoros gieđaid. 4 De eaiggát vuolggahii sin lusa nuppi bálvaleaddji, ja suge sii illastedje ja heahppášuhtte. 5 Son vuolggahii dasto eará bálvaleaddji, ja su sii godde. Nu geavai earáidege; muhtumiid sii cábme, muhtumiidgis godde. 6 Dál sus lei dušše okta, iežas ráhkis bárdni. Su son vuolggahii maŋimužžan láigoheddjiid lusa, danin go son jurddašii: ‘Mu bártni sii goittot gudnejahttet.’ 7 Muhto láigoheaddjit dadje guhtet guoibmáseaset: ‘Diet lea árbbolaš. Goddot su, de árbi lea min.’ 8 Sii dohppejedje su, godde su ja bálkestedje olggos viidnegárddis.

9 Maid viidnegárddi eaiggát dál dahká? Son boahtá ja heavaha láigoheddjiid ja addá viidnegárddi earáide. 10 Almma lehpet lohkan čállagiin dán báikki: Geađgi maid huksejeaddjit hilgo, lea šaddan čiehkageađgin. 11 Dat lea Hearrá dahku, ja dat lea ovddolaš min čalmmiin.

12 Sii dáhtto váldit su gitta, muhto balle olbmuin. Sii áddejedje ahte son muitalii dán veardádusa sin birra. De sii guđđe su ja manne eret.

Vearuid máksin keaisárii

13 Dasto sii vuolggahedje su lusa muhtun farisealaččaid ja Herodesa doarjaleddjiid giellat su sániiguin. 14 Sii bohte ja dadje sutnje: “Oahpaheaddji, mii diehtit ahte don leat vuoiggalaš. Don it beroš das maid earát oaivvildit itge geahča olbmo hápmái, muhto oahpahat Ipmila geainnu duohtavuođas. Leago riekta máksit vearuid keaisárii vai ii? Galgatgo mii máksit vai eat?” 15 Muhto Jesus dovddai sin guoktilašvuođa ja celkkii sidjiide: “Manne dii geahččalehpet giellat mu? Čájehehket munnje denára.” 16 Sii čájehedje ruđa, ja son jearai: “Gean govva ja namma das lea?” Sii vástidedje: “Keaisára.” 17 Dalle Jesus celkkii sidjiide: “Addet keaisárii dan mii gullá keaisárii, ja Ipmilii dan mii gullá Ipmilii.” Sii ovddošedje sakka su vástádusa.

Jábmiid bajásčuožžileapmi

18 De Jesusa lusa bohte muhtun saddukealaččat geat dadjet ahte ii leat bajásčuožžileapmi. Sii jerre sus: 19 “Oahpaheaddji, Moses lea mearridan ná: Jos muhtuma viellja jápmá ja sus báhcá áhkká muhto ii mánná, de dát olmmái galgá váldit vieljas áhká ja addit vielljasis náli. 20 De ledje čieža vieljaža. Boarráseamos sis válddii áhká, muhto jámii mánáheapmin. 21 Dalle nubbi válddii leaskka, muhto songe jámii mánáheapmin. Nu geavai goalmmádiige 22 ja buot čiehččasii: Ii oktage sis ožžon máná. Buot maŋimužžan jámii nisson. 23 Go sii bajásčuožžileami beaivvi čuožžilit jábmiid luhtte, de gean áhkká son dalle lea? Buot čiežashan leat atnán su áhkkán.”

24 Jesus vástidii: “Dii čádjidehpet, danne go ehpet dovdda čállagiid ehpetge Ipmila fámu. 25 Go jábmit čuožžilit, de sii eai náital eaige náitojuvvo, muhto sii leat dego eŋgelat almmis. 26 Muhto mii boahtá dasa ahte jábmit čuožžilit, de ehpetgo leat lohkan Mosesa girjjis muitalusa buolli bastilislátnjámiestagis? Das Ipmil cealká Mosesii: Mun lean Abrahama Ipmil, Isaka Ipmil ja Jakoba Ipmil. 27 Ii son leat jábmiid, muhto ealli olbmuid Ipmil. Dii lehpet oalát čádjidan.”

Lága deháleamos báhkkon

28 Muhtun čáloahppavaš lei guldalan sin ságastallama ja fuomášan man bures Jesus vástidii saddukealaččaide. Son bođii Jesusa lusa ja jearai: “Guhtemuš báhkkon lea buot deháleamos?” 29 Jesus vástidii: “Deháleamos báhkkon lea dát: Gula, Israel! Hearrá, min Ipmil, Hearrá lea okta. 30 Ráhkis Hearrá, Ipmilat, oppa váimmus, oppa sielus, oppa mielas ja oppa fámus. 31 Nubbi lea dát: Ráhkis lagamuččat nugo iežat. Ii mihkkege báhkkomiid leat stuorit go dát guokte.” 32  Čáloahppavaš dajai sutnje: “Oahpaheaddji, don leat vuoigadis. Don dadjet duođa go celket ahte Hearrá lea áidna Ipmil, earret su ii leat oktage. 33 Ja go olmmoš ráhkista su oppa váimmus ja oppa jierpmis ja oppa fámus ja ráhkista lagamuččas nugo iežas, de dat lea eambbo go boaldinoaffarat ja buot eará oaffarat.” 34 Go Jesus gulai ahte son vástidii jierpmálaččat, de son celkkii sutnje: “Don it leat guhkkin eret Ipmila riikkas.” Iige oktage duostan šat jearrat Jesusis maidege.

Leago Messias Davida bárdni?

35 Go Jesus oahpahii tempelis, de son jearai: “Mo čáloahppavaččat sáhttet dadjat ahte Messias lea Davida bárdni? 36 David ieš lea cealkán Bassi Vuoiŋŋa bokte: Hearrá celkkii mu hearrái: Čohkán mu olgeš beallái, dassážii go mun bijan du vašálaččaid du julggiid vuollái. 37 David ieš gohčoda Messiasa hearrán. Mo Messias dalle sáhttá leat Davida bárdni?”

Váruhehket čáloahppavaččain!

Ollu olbmot guldaledje mielasteaset Jesusa. 38 Go son oahpahii sin, de son celkkii: “Váruhehket čáloahppavaččain! Sii liikojit vázzit guhkes biktasat gárvun ja dáhttot olbmuid dearvvahit sin márkanšiljus, 39 sii čohkánit ovddimus stuoluide synagogas ja gudnesajiide go leat guossis, 40 muhto loktet leaskkaid viesuid ja atnet guhkes rohkosiid dušše hámi dihte. Dađe garraseabbon šaddá sin duopmu.”

Leaskka attáldat

41 Jesus čohkánii tempelbumbbá báldii ja geahčadii mo olbmot bidje dasa ruđaid. Eatnat riggát adde ollu. 42 De bođii geafes leaskanisson ja bijai bumbái guokte šlántte, moatti evrre veara. 43 Jesus rávkkai máhttájeddjiid lusas ja celkkii: “Duođaid, mun cealkkán didjiide: Dát geafes leaska bijai bumbái eambbo go buohkat earát. 44 Buohkat earát adde valljivuođasteaset, muhto son attii geafivuođastis buot mii sus lei, oppa eallámušas.”

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.