Ukraina flaggRedder Bibelen liv i Ukraina?
Finn ut mer
Gå til forsiden

Njealját Mosesgirji

17

Arona soabbi

1 Hearrá sártnui Mosesii:

2 Cealkke israellaččaide ahte juohke čeardaoaivámuš galgá addit dutnje soappi, ovtta soappi guđege čeardda nammii, buohkanassii guoktenuppelohkái soappi. Čále guđege oaivámučča nama su soabbái. 3 Levi soabbái galggat goit čállit Arona nama; okta soabbi galgá leat guđege bearašoaivámučča nammii. 4 Bija soppiid almmustusgoahtái lihtumearkka ovdii gos mun almmustuvan didjiide, 5 ja soabbi mii gullá dan olbmái gean mun lean válljen, urbbiida. Nu mun jaskkodahtán israellaččaid nimmoreami dudno vuostá.

6 Moses almmuhii dán israellaččaide, ja buot sin bearašoaivámuččat adde sutnje soappi, oktiibuot guoktenuppelohkái soappi, ja Arona soabbi lei daid gaskkas. 7 Moses bijai soppiid Hearrá muođuid ovdii lihtumearkka goahtái.

8 Maŋit beaivvi Moses manai lihtumearkka goahtái. Dalle Arona soabbái, Levi soga soabbái, ledje ihtán urbbit. Dat urbbiidii, lieđui ja šaddadii láddan mándeliid. 9 Moses válddii buot soppiid eret Hearrá muođuid ovddas ja guttii daid israellaččaid ovdii. Sii geahčadedje daid, ja de juohkehaš válddii iežas soappi.

10 Hearrá sártnui Mosesii: “Doalvvo Arona soappi ruoktot lihtumearkka ovdii. Doppe dat galgá leat mearkan vuostehágolaččaide. Nu don loahpahat sin nimmoreami mu vuostá, eaige sii dárbbaš jápmit.”

11 Moses dagai nugo Hearrá lei gohččon su.

12 Muhto israellaččat dadje Mosesii: “Mii heavvanit, mii duššat, mii buohkat duššat! 13 Jos juohkehaš gii lahkana Hearrá goahtái, duššá, de mii duššat buohkat.”

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.