Stor bibelmangel i Venezuela
Gi sammenEn Bibel koster 49 kroner
Gå til forsiden

Njealját Mosesgirji

33

Israellaččaid gohttenbáikkit meahcis

1 Dát leat israellaččaid gohttenbáikkit dan rájes go sii soahteveagaid soahteveagaid vulge Mosesa ja Arona geahčus Egyptas. 2 Juohke háve go israellaččat vulge gohttenbáikkisteaset, de Moses čálii Hearrá gohččuma mielde muitui báikki nama. Dát lea logahallan sin gohttenbáikkiin. 3 Israellaččat vulge Ramsesis vuosttaš mánu vihttanuppelogát beaivvi. Beaivvi maŋŋil beassážiid sii vulge roahkkadit johtui buot egyptalaččaid oaidnut, 4 dan botta go egyptalaččat ledje hávdádeamen iežaset vuosttašriegádeddjiid. Hearrá lei goddán sin ja nu diktán duomuidis deaividit egyptalaččaid ipmiliid.

5 Ramsesis israellaččat manne Sukkotii ja luoitaledje dohko. 6  De sii vulge Sukkotis ja luoitaledje Etamii, meahci ravdii. 7 Go sii ledje vuolgán Etamis, de sii gávve Pi-Hahirota guvlui mii lea Baal Sefona buohta, ja luoitaledje Migdola lahkosii. 8 Go sii ledje vuolgán Pi-Hahirotis, de sii manne meara rastá meahccái, johte golbma beaivása Etammeahcis ja luoitaledje Marai. 9 Maras sii manne Elimii. Elimis ledje guoktenuppelohkái čáhceádjaga ja čiežalogi pálbmamuora, ja sii luoitaledje dohko. 10 Elima maŋŋil sii luoitaledje Ruksesmeara gáddái. 11 Ruksesmeara gáttis sii manne Sinmeahccái ja luoitaledje dohko. 12 Sinmeahcis sii manne Dofkai. 13 Dofkas sii manne Alušii. 14  Sii vulge Alušis ja luoitaledje Refidimii, muhto doppe álbmogii ii lean čáhci juhkat. 15 Refidimis sii manne Sinaimeahccái ja luoitaledje dohko. 16 Sii vulge Sinaimeahcis ja luoitaledje Kibrot Hattaavai, 17  Kibrot Hattaavas Haserotii, 18 Haserotis Ritmai, 19 Ritmas Rimmon Peresii, 20 Rimmon Peresis Libnai, 21 Libnas Rissai, 22 Rissas Kehelatai, 23 Kehelatis Šefervári vuollái, 24 Šefervári vuolde Haradai, 25 Haradis Makhelotii, 26 Makhelotis Tahatii, 27 Tahatis Terahii, 28 Terahis Mitkai, 29 Mitkas Hašmonai, 30 Hašmonas Moserotii, 31 Moserotis Bene-Jaakanii, 32 Bene-Jaakanis Hor-Hagidgadii, 33 Hor-Hagidgadis Jotbatai, 34 Jotbatas Abronai, 35 Abronas Esjon-Geberii 36 ja Esjon-Geberis Sinmeahccái Kadešii. 37 Kadešis sii manne Horvári vuollái Edoma rájá ala ja luoitaledje dohko.

38 Báhppa Aron manai Hearrá gohččuma mielde Horvárrečohkkii, ja dohko son jámii. Dat dáhpáhuvai njealljelogi jagi maŋŋil go israellaččat ledje vuolgán Egyptas, viđát mánu vuosttaš beaivvi. 39 Aron lei čuođiguoktelogigolmmajahkásaš go jámii Horvárrái.

40 Kanaanlaš Arada gonagas, gii ásai Negevis Kanaanis, gulai ahte israellaččat ledje boahtimin.

41 Go israellaččat ledje vuolgán Horváris, de sii manne Salmonai ja luoitaledje dohko. 42 Sii vulge Salmonas ja luoitaledje Punonii, 43 de Obotii 44 ja de Ije Abarimii Moaba rájá ala. 45 Sii vulge Ije Abarimis ja luoitaledje Dibon Gadii, 46 de Almon Diblatajimii 47 ja de Abarimváriide Nebo buohta. 48 Go sii ledje vuolgán Abarimváriin, de sii luoitaledje Moaba duolbadasaide Jordangáddái Jeriko buohta. 49 Jordangáttis sin siida olii Bet-Haješimotis Abel Hašittimii.

Rávvagat Kanaana váldima várás

50 Moaba duolbadasain Jordangáttis Jeriko buohta Hearrá sártnui Mosesii:

51 Cealkke israellaččaide: Go dii lehpet mannan Jordana rastá Kanaanii, 52 de duššadehket ovddasteattet buot dan eatnama ássiid. Duššadehket buot sin geađgái čullojuvvon eahpeipmiliid ja buot sin leikejuvvon ipmilgovaid, ja heavahehket buot sin oaffarbáikkiid. 53 Váldet eatnama oapmineattet ja ásset dohko, dasgo mun attán dan didjiide oapmin. 54 Juogadehket eatnama vuorbádemiin sogaid mielde. Stuorra sohkii galgabehtet addit stuorra oasi ja unna sogažii unna oasáža. Juohke sohka galgá oažžut oasi doppe gos vuorbi mearrida. Juogadehket eatnama áhčiideattet čearddaid mielde. 55 Muhto jos dii ehpet áje eret eatnama ássiid, de dat geaid diktibehtet báhcit, šaddet biikan din čalmmiide ja seahčagassan din gilgii, ja sii fallehit din dan eatnamis gos ássabehtet. 56 Ja dan maid mun áigon dahkat sidjiide, mun dagange didjiide.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.