Bibel lillaBibel 2024
Dato14Kommer 14. mars
Gå til forsiden

Obadja

1 

1 Obadja oainnáhus.

Edoma duopmu

Ná cealká Hearrá Ipmil Edoma birra:

Mii leat gullan maid Hearrá lea sárdnon,

áirras lea vuolggahuvvon

álbmogiid gaskii gulahit:

“Čuožžilehket,

ráhkkanehkot soahtat Edomiin!”

2 Mun dagan du uhccin

álbmogiid gaskkas,

buohkat badjelgehččet du.

3 Du váimmu goargatvuohta

lea beahttán du,

don gii ásat bákteskoaruin

ja orodat alážiin. Don jurddašat:

“Gii sáhttá norddastit mu vuolás eatnamii?”

4 Vaikko don huksešit

allagassii nugo goaskin,

vaikko dagašit beasi násttiid gaskii,

de doppege mun norddastan du vuolás,

cealká Hearrá.

5 Jos du lusa boađášedje suollagat

ja rievvárat ihkku

– vuoi, don duššat –

de suoládivččego sii eambbo go dárbbašit?

Jos viidnemuorječoaggit boađášedje

du viidnegárdái,

eaigo sii dalle guođáše maŋŋerádjama?

6 Muhto Esau dutkojuvvo,

su čiegus vuorkkát boltojuvvojit.

7 Du lihttoguoimmit ádjet du

gitta rájá rádjái.

Du buorit ustibat behttet du,

sii bihtet dus ja bidjet du válddiset vuollái.

Dat geat borre du láibbi,

bidjet giela du ovdii.

8 Dan beaivvi mun loahpahan

Edoma viisáid

ja viissisvuođa Esau váris,

cealká Hearrá.

– Doppe ii leat mihkkege viissisvuođaid. –

9 Du soahteolbmát, Teman,

dohppehallet ballui,

ii oktage báze Esau várrái.

Olmmošgoddima dihte,

10 danin go leat leamaš veahkaválddálaš

vieljat Jakoba vuostá,

don heahppášuhttojuvvot

ja duššaduvvot agibeaivái.

11 Dan beaivvi go vierrásat

bahkkejedje sisa Jerusalema poarttain,

vuorbádalle dan ássiid

ja dolvo sin mielddiset,

de dalle don čužžot gáidosis

ja geahčadit buot dán

vašálažžan vašálaččaid searvvis.

12 Ale geahča ilus vielljasat

su lihkuhisvuođa beaivvi!

Ale illut dan beaivvi go Juda olbmot duššet!

Ale hiddjit sin sin heahtebeaivvi!

13 Ale bahkke sisa mu álbmoga poarttain

dan lihkuhisvuođa beaivvi!

Ale illut mu álbmoga gillámuša dihte

dan lihkuhisvuođa beaivvi!

Ale geige gieđa váldit sin riggodaga

sin lihkuhisvuođa beaivvi!

14 Ale čuoččo bálggesearus

goddimin daid geat geahččalit

beassat báhtui!

Ale atte vašálačča gihtii

daid geat ledje beassan báhtui

heahtebeaivvi!

15 Lahka lea Hearrá beaivi,

lahka buot álbmogiid.

Nugo don leat dahkan,

nu dutnje dahkkojuvvo.

Du meannu máhccá du iežat oaivái.

Israel huksejuvvo ođđasis

16 Dan geara maid dii bággehalaidet

juhkat mu bassi váris,

gártet buot álbmogat juhkat ain ođđasis.

Sii gártet juhkat dan botni ráje.

Sii luottahuvvet dego eai goassege

livčče oppa leamašge.

17 Muhto Sionváris

ássá gáddjojuvvon olbmuid joavku.

Dat lea bassi báiki.

Jakoba nálli váldá fas iežas árbeeatnamiid.

18 Jakoba nálli šaddá dollan

ja Josefa nálli dollanjuovččan,

muhto Esau nálli šaddá oalgan

mii buolláhuvvo ja duššá.

Esau nális ii báze ii oktage.

Hearrá lea sárdnon.


19 Dat Juda olbmot geat ásset Negevis, váldet Esau váriid, ja dat geat ásset Šefelas, váldet Filistea. Eará Juda olbmot váldet Efraima ja Samaria váriid, ja Benjamin váldá Gileada. 20 Halaha dolvojuvvon israellaččat váldet kanaanlaččaid eatnama gitta Sarepta rádjái, ja Sefarada dolvojuvvon jerusalemlaččat váldet Negeva gávpogiid. 21 Buot dat geat leat gáddjojuvvon, mannet Sionvárrai ja hálddašit maiddái Esau váriid.

Gonagasváldi gullá Hearrái.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.