Stor bibelmangel i Venezuela
Gi sammenEn Bibel koster 49 kroner
Gå til forsiden

Sálmmaid girji

21

Sálbma 21

1 Koarrajođiheaddjái. Davida sálbma.


2 Hearrá, du fápmu

illudahttá gonagasa,

son ávvuda sakka du bestojumis.

3 Masa su váibmu hálidii

dan don addet sutnje,

it biehttalan sus

maid su baksamat átno. Sela

4 Don addet sutnje

buressivdnádusa ja oasálašvuođa,

bidjet su oaivái gollekruvnnu.

5 Son ánui dus eallima,

ja dan don sutnje addet,

guhkes eallima,

eallinjagiid lohkameahttun ollu.

6 Du veahkki dahká

su gudni stuorisin,

don addet sutnje allatvuođa

ja hearvásvuođa.

7 Don attát sutnje

agálaš buressivdnádusa,

deavddát su iluin muođuidat ovddas.

8 Go gonagas dorvvasta Hearrái,

de son ii lihkahuvvo,

dasgo Alimus lea oskkáldas.

9 Du giehta fáhte buot vašálaččaidat,

du olgeš giehta deaivá daid

geat vašuhit du.

10 Don bijat sin dego dollaommanii,

go sii oidnet du muođuid.

Hearrá loaktá sin moaristis,

dolla njielasta sin.

11 Don duššadat sin mánáid eatnamis,

sin náli olbmuid gaskkas.

12 Sii smihttet baháid du vuostá,

sii hutket juonaid,

muhto dat eai lihkostuva.

13 Don gealddát dávggi sin njeaiga,

don áját sin báhtarussii.


14 Čuožžil, Hearrá, čájet gievravuođat!

Mii máidnut du stuorra fámu

lávlumiin ja čuojahemiin.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.