Ukraina flaggRedder Bibelen liv i Ukraina?
Finn ut mer
Gå til forsiden

Sálmmaid girji

69

Sálbma 69

1 Koarrajođiheaddjái. Lávlojuvvo dego “Lilját”. Davida sálbma.


2 Ipmil, beastte mu!

Čáhci ollá mu čoddaga rádjái.

3 Mun lean vudjon

čiekŋalis rábáhii,

mu julggiide ii leat coakci.

Mun lean boahtán čáziid čiekŋalassii,

rávdnji golgá mu badjel.

4 Mun lean čurvon váibamassii,

mu čotta goiká.

Mu čalmmit leat sotnan,

go mun lean vuordán du, Ipmil.

5 Dat geat vašuhit mu almmá siva haga

leat eambbo go vuoktačalmmit mu oaivvis.

Olusat leat dat geat bivdet mu heakka,

dat geat vašuhit mu

almmá ášši haga.

Maid in leat suoládan,

dan mun goit ferten máhcahit.


6 Ipmil, don dovddat mu jallavuođa,

mu suttut eai biso čihkosis

du čalmmiid ovddas.

7 Ale divtte šaddat heahpanit

mu dihte daid geat vurdet du,

Hearrá, Almmiveagaid Ipmil!

Ale divtte šaddat bilkiduvvot

mu dihte daid geat ohcet du,

Israela Ipmil.

8 Dasgo du dihte

mun gierddan hiddjádusa,

mu muođut leat ruvssodan heahpadis.

9 Mun lean šaddan vierisin

vieljaidasan,

eadnán mánáide mun lean

amas olmmoš.

10 Áŋgirvuohta du viesu dihte

lea loahpahan mu,

ja daid hiddjádusat geat hiddjidit du,

leat deaivan munnje.

11 Mun čirron ja fástudin,

muhto datge buvttii munnje bilkku.

12 Mun gárvodin horstta,

muhto šadden sin bilkolávlaga fáddán.

13 Olbmot bilkidit mu

go čohkkájit gávpotpoarttas,

mun lean šaddan juhkkiid lávlunfáddán.


14 Muhto mun rohkadalan du, Hearrá,

vare dát boddu livččii vuogas.

Ipmil, vástit munnje

stuorra buorrevuođastat,

atte munnje oskkáldas veahkát.

15 Gájo mu, aman vuodjut rábáhii,

gájo mu vašuheddjiidan gieđas

ja čiekŋalis čáziin.

16 Ale divtte rávnnji golgat mu badjel,

ale divtte čiekŋalasa njiellat mu

alege gáivvo giddet njielus

mu oaivvi badjel.

17 Vástit munnje, Hearrá,

dasgo du oskkáldasvuohta lea buorre,

geahča mu beallái

stuorra váibmoláđisvuođastat!

18 Ale čiega muođuidat

iežat bálvaleaddjis.

Mun lean heađis,

gáhča vástidit munnje!

19 Boađe mu lusa ja čoavdde mu,

lonis mu mu vašálaččain.

20 Don dieđát mo mun hiddjiduvvon,

mo mun gillán bilkku ja heahpada,

donhan oainnát buot mu vašálaččaid.

21 Sin hiddjádusat leat cuvken mu váimmu,

mu hávvi ii leat buorideames.

Mun vurden árpmoštallama,

muhto duššás,

soapmása gii jeđđešii mu,

muhto in gávdnan ovttage.

22 Sii seaguhedje mirkko

mu borramuššii,

ja go mun goiken, de sii

jugahedje munnje etteha.

23 Vare sin beavdi šattašii sidjiide giellan

ja sin oaffarmális lihkohisvuohtan!

24 Vare sin čalmmit sevnnjodivčče,

vare sin alimat suibbošedje álelassii!

25 Golggat suhtot sin badjelii,

divtte buolli moarát juksat sin.

26 Vare sin siida šattašii ávdimin,

allos oktage ásso sin gođiin.

27 Sii doarridit dan gean

don leat časkán,

sii lasihit su bákčasa

gean don leat hávvádahttán.

28 Lasit sidjiide sivalašvuođa

sivalašvuhtii,

ale suova sin goassege gáddjojuvvot.

29 Vare don sihkošit sin eallima girjjis,

vare sin namat eai čállojuvvoše

vuoigatlaččaid lohkui.

30 Muhto mun lean vártnuheapme

ja váivviduvvon,

beastte mu, Ipmil,

ja atte munnje suoji!


31 Mun máinnun

Ipmila nama lávlumiin,

mun gudnejahtán su

rámáduslávlagiiguin.

32 Dasa Hearrá liiko

eambbo go vuovssáide,

eambbo go burruide

main leat čoarvvit ja gaccat.

33 Váivvášat oidnet dan ja illudit,

daid váibmu ealáska

geat ohcet Hearrá.

34 Hearrá gullá gefiid rohkosa,

son ii hilggo olbmuidis

geat leat fáŋgavuođas.

35 Albmi ja eanan máidnot su,

mearat ja buot mii dain lihkada.

36 Ipmil beastá Siona

ja hukse Juda gávpogiid.

Doppe su olbmot ožžot ássat

ja oamastit eatnama.

37 Su bálvaleddjiid nálli árbe dan,

dat geat ráhkistit su nama,

besset ássat doppe.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.