Iran: Kristne ønsker nytestamenter
Gi sammenEt NT koster 33 kroner
Gå til forsiden

Sálmmaid girji

71

Sálbma 71

1 Hearrá, dutnje mun dorvvastan,

ale goassege hilggo mu.

2 Don leat oskkáldas,

gájo mu ja beastte mu!

Jorgal bealji mu beallái ja veahket mu.

3 Leage munnje bákti man suodjái

sáhtán báhtarit,

ladni gos gávnnan bestojumi.

Don leat mu bákti ja mu ladni.

4 Ipmil, beastte mu baháid gieđas,

gájo mu ipmilmeahttuma

ja veahkaválddálačča válddis.

5 Don leat mu doaivu,

Hearrá, mu Ipmil,

nuorravuođa rájes mun lean

dorvvastan dutnje, Hearrá.

6 Riegádeapmán rájes leat don leamaš

mu doarjja,

eadnán goaŧu rájes mu givrodat.

Du mun máinnun álelassii.

7 Eatnagiidda mun lean šaddan mearkan,

muhto don leat mu nana dorvu.

8 Mu njálmmi dievva

lea du rámádus,

geažos beaivvi mun máinnun

du hearvásvuođa.

9 Ale hilggo mu

go lean boarásmuvvan,

ale guođe mu go mu fápmu nohká.

10 Dat geat vuđgŋet mu heakka,

ráđđádallet gaskaneaset,

mu vašálaččat dadjet:

11  “Ipmil lea hilgon su.

Doarridehket ja dohppejehket su,

ii su oktage gájo.”

12 Ipmil, ale leage guhkkin!

Mu Ipmil, gáhča veahkehit mu.

13 Šaddoset heahpadii

ja duššoset dat geat uhkidit mu,

deaividehkos heahpat ja hiddjádus daid

geat dáhttot vahágahttit mu!


14 Muhto mus lea álelassii doaivu,

mun lávllun álo du rámádusa.

15 Mu njálbmi muitala

du oskkáldasvuođa

ja álelassii du veahki valljivuođa,

vaikko in goassege ádde dan ollásit.

16 Hearrá, mu Ipmil, mun muitalan

du stuorra daguid,

rámidan oskkáldasvuođa

maid aivvefal don veaját čájehit.

17 Ipmil, don oahpahit mu

juo dalle go ledjen nuorra,

ja vel ain mun muitalan du oavdudaguid.

18 Ale hilggo mu, Ipmil,

dál go lean boaris ja čuorgat.

Divtte mu gulahit du fámu

boahtti buolvvaide.


19 Ipmil, du fápmu

ja oskkáldasvuohta ollá albmái.

Du dagut leat stuorrát, Ipmil,

gii lea du veardásaš?

20 Don leat addán mu oaidnit

stuorra áŧestusaid

ja ollu oasehisvuođa,

muhto don áhpásmahtát mu fastain

ja loktet mu

eatnama čiekŋalasain.

21 Don lasihat mu gudni,

don attát fas munnje jeđđehusa.

22 Dalle mun rámidan du oskkáldasvuođa

hárpačuojahemiin, Ipmil,

mun máinnun du lyra šuoŋaiguin,

Israela Bassi.

23 Mu baksamat ávvudit

go mun čuojahan du gudnin,

mu siellu illuda danin go

don lonistit mu.

24 Heaittikeahttá mu njuovčča

muitala du vuoigatlašvuođa,

muhto dat geat sávvet munnje bahá,

šaddet heahpanit ja bilkiduvvot.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.