Ukraina flaggRedder Bibelen liv i Ukraina?
Finn ut mer
Gå til forsiden

Allalávlla

7 Irgi

1 Du sandálajuolggit leat nu čábbát,

don allanálat nieida!

Du alimiid jorbodat lea dego čikŋa,

čeahpes gieđa duodji.

2 Du aski lea jorba cearki –

vare das ii goassege váilloše viidni!

Du čoavji lea dego nisogordnečopma,

liljáiguin áidojuvvon.

3 Du čiččit leat dego goddemiesit,

nugo gasella jumežat.

4 Du čeabet lea elefántabátnetoardna,

du čalmmit dego Hešbona láddot

Bat Rabbima poartta guoras.

Du njunni lea dego Libanona toardna

mii várdáda Damaskusa guvlui.

5 Du oaivi loktana Karmela láhkái,

du vuovttat leat nugo purpur,

daid smarvvit geasuhit gonagasa.

6 Don leat čáppat, don leat liekkus,

mu iežan ráhkis, mu hálidus!

7 Du šođbes hápmi lea

dego pálbmamuora lágáš,

du čiččit dego muorjegihput.

8 Mun jurddašan:

Mun goarkŋun dan pálbmamurrii,

ja dollen dan gierragii!

Dego viidnemuorjegihput leat du čiččit,

du vuoiŋŋanasas lea ehpelhádja,

9 du njálbmi dego buoremus viidni,

mii golgá mu njálbmái

ja láktada baksamiid ja bániid.

Moarsi

10 Mun gulan ráhkkásasan,

ja munnje lea su hállu.

11 Boađe, mu ráhkis, vuolgu meahccái,

idjadeadnu hennamiestagiid gaskii!

12 Vuolgu iđedis viidnegárddiide

geahččat jogo viidnemuoras leat lieđit

ja urbbit rahpasit,

jogo granáhtaehpelmuorat liđđot.

Doppe mun attán dutnje ráhkisvuohtan.

13 Gierranmuorjjit haksojit,

munno uvssa guoras

leat juohkelágán hearvás šaddosat,

ođđasat ja boarrásat.

Dutnje, ustibažžan, mun lean daid vurken.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.