Ukraina flaggRedder Bibelen liv i Ukraina?
Finn ut mer
Gå til forsiden

Sakarja

10

Hearrás lea fápmu, ii eahpeipmiliin

1 Ánuhehket Hearrás arvvi

go lea giđđaarvviid áigi.

Hearrá dahká arvebalvvaid,

son addá arveovttiid,

juohke olbmui eatnama šattuid.

2 Muhto viessoipmilat sárdnot giellásiid,

einnosteaddjit oidnet vearreoainnáhusaid,

muitalit behtolaš nieguid,

sin jeđđehus lea guorus.

Dan dihte álbmot čádjádallá dego sávzaeallu

ja gillá heađi, danne go báimman ii leat.

Israel čohkkejuvvo fas

3 Mu moarri lea cahkiidan

báimmaniid vuostá,

ja bohkáid mun ráŋggáštan.

Hearrá, Almmiveagaid Ipmil,

atná fuola iežas ealus, Juda álbmogis,

ja dahká dan iežas gorges soahteheastan.


4 Judas boahtá čiehkageađgi,

doppe giddennávli, doppe soahtedávgi,

doppe juohke ráđđejeaddji.

5 Juda olbmát sohtet dego sáŋgárat,

dulbmet soađis vašálačča

dego gáhtaid durddi.

Sii sohtet, dasgo Hearrá lea singuin,

ja riidejeaddjit vuoittáhallet.

6 Mun dagan Juda čeardda gievran,

ja Josefa čeardda mun beasttán.

Mun buvttán sin ruoktot,

dasgo mun árpmihan sin.

Dalle sii leat dego mun in livčče

goassege oppa hilgonge sin.

Mun lean Hearrá, sin Ipmil,

mun gulan sin rohkosiid.

7 Efraima olbmot leat dego sáŋgárat,

sii leat ilus dego olmmoš gii juhká viinni.

Sin mánát oidnet dan ja ávvudit,

sin váibmu illuda Hearrás.

8 Mun njurggádan sidjiide

ja čohkken sin,

dasgo mun lean lonistan sin,

ja sii šaddet seammá eatnagin

go sii oktii ledje.

9 Jos mun biđgen sin álbmogiid gaskii,

ja sii muitet mu gáiddus báikkiin,

de sii ja sin mánát ožžot eallit

ja máhccat ruoktot.


10 Mun divttán sin máhccat Egyptas,

ja Assyrias mun čohkken sin.

Mun divttán sin boahtit Gileadii ja Libanonii,

muhto doppege sidjiide ii leat sadji galle.

11 Eatnu časkojuvvo,

dan bárut váiduduvvojit.

Buot Nileanu čiekŋalis rávnnjit goiket,

Assyria goargatvuohta njeidojuvvo

ja Egypta ráđđensoabbi gáidá.

12 Mun, Hearrá, lea álbmogan givrodat,

mu namma addá dasa gudni,

cealká Hearrá.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.