Stor bibelmangel i Venezuela
Gi sammenEn Bibel koster 49 kroner
Gå til forsiden

Sakarja

2

Nubbi oainnáhus: Čoarvvit ja rávdit

1 Mun bajidin čalmmiid ja oidnen njeallje čoarvvi. 2 Mun jerren eŋgelis guhte sártnui muinna: “Mat dát leat?” Son vástidii: “Dát čoarvvit leat biđgen Juda, Israela ja Jerusalema.” 3 Dasto Hearrá čájehii munnje njeallje rávdi. 4 Mun jerren eŋgelis: “Maid sii áigot dahkat?” Son vástidii: “Dat čoarvvit leat biđgen Juda, nu ahte ii oktage leat sáhttán bajidit oaivvi. Dál dát njeallje rávdi leat boahtán suorggahit vašálaš álbmogiid eret ja čuollat daid čorvviid maiguin dat leat dorron Juda ja biđgen dan álbmoga.”

Goalmmát oainnáhus: Mihttobáddi

5 De mun oidnen olbmá geas lei mihttobáddi gieđas. 6 Mun jerren sus: “Gosa don leat mannamin?” Son vástidii: “Mun manan mihtidit Jerusalema vai beasan oaidnit man govdagin ja guhkkin dat šaddá.” 7 De bođii dat eŋgel gii lei sárdnon muinna, ja muhtun eará eŋgel manai su ovddal 8 ja celkkii sutnje: Doama dadjat dan nuorra olbmái ná:

Jerusalema birra eai šat huksejuvvo muvrrat,

nu ollu das leat olbmot ja oamit.

9 Mun ieš lean dollamuvran dan birra,

cealká Hearrá,

ja dan gasku mun ásan hearvásvuođastan.

10 Vulget, vulget!

Báhtarehket davvieatnamis!

cealká Hearrá.

Mun ledjen biđgen din

buot njealji almmiguvlui,

cealká Hearrá.

11 Vuolgge, Sion! Báhtarehket,

dii geat ássabehtet Babylonis!

12 Ná cealká Hearrá, Almmiveagaid Ipmil,

daid álbmogiid hárrái

mat leat rievidan din:

Dat gii guoská mu álbmogii,

guoská mu čalbmegáhkkái.

13 Mun bajidan gieđa

daid álbmogiid vuostá,

ja dat šaddet šlávaideaset stajádussan.

Dalle dii diehtibehtet

ahte Hearrá, Almmiveagaid Ipmil,

lea vuolggahan mu.

14 Illut ja ávvut, nieida Sion!

Geahča, mun boađán ja ásan du lusa,

cealká Hearrá.

15 Dan beaivvi ollu álbmogat

servet Hearrái,

ja datnai šaddet su álbmogin.

Son ieš ássá du lusa.

Dalle don ipmirdat ahte Hearrá,

Almmiveagaid Ipmil,

lea vuolggahan mu du lusa.

16 Hearrá váldá Juda opmodahkanis,

iežas oassin bassi eatnamis,

ja vállje fas Jerusalema.


17 Orrot jaska Hearrá muođuid ovddas,

buot heakkalaččat!

Hearrá loaiddasta ovdan

bassi ássanbáikkistis.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.