Ukraina flaggRedder Bibelen liv i Ukraina?
Finn ut mer
Gå til forsiden

Sakarja

3

Njealját oainnáhus: Bajimusbáhppa Josua

1 De Hearrá divttii mu oaidnit bajimusbáhppa Josua gii čuoččui Hearrá eŋgela ovddas. Sáhtán čuoččui Josua olgeš bealde, gearggusin sivahallat su. 2 Hearrá eŋgel celkkii Sáhtánii: “Hearrá belkos du, Sáhtán! Hearrá, guhte lea válljen Jerusalema, belkos du! Iigo dát olmmái leat ráddi, dolas gáddjojuvvon?” 3 Josua čuoččui eŋgela ovddas, duolva biktasat gárvun. 4 Eŋgel celkkii bálvaleddjiidasas: “Nullet sus duolva biktasiid!” Josuai son celkkii: “Geahča, mun lean váldán du suddovealggi eret, ja mun gárvvuhan dutnje ávvubiktasiid.” 5 De son celkkii bálvaleddjiidasas: “Bidjet buhtis turbána su oaivái!” Bálvaleaddjit bidje buhtis turbána Josua oaivái ja gárvvuhedje sutnje ávvugárvvuid, dan botta go Hearrá eŋgel čuoččui das. 6 De Hearrá eŋgel duođaštii Josuai:

7 Ná cealká Hearrá, Almmiveagaid Ipmil:

Jos don vádjolat mu geainnuid

ja doahttalat mu báhkkomiid,

de don beasat hovdet mu tempela

ja geahččat bearrái mu ovdašiljuid.

Mun divttán du searvat

dáidda mu bálvaleddjiide.


8 Gula, Josua, bajimusbáhppa! Don ja dat báhpat geat čohkkájit du ovddas, lehpet mearkan das ahte mun vuolggahan bálvaleaddján Vesá. 9 Dan geađgái maid mun lean bidjan Josua muođuid ovdii, dán ovtta geađgái mas leat čieža čalmmi, mun goban čállosa, cealká Hearrá, Almmiveagaid Ipmil. Ovtta áidna beaivvis mun válddán eret dán eatnama suddovealggi. 10 Dan beaivvi, cealká Hearrá, Almmiveagaid Ipmil, dii bovdebehtet guhtet guimmiideattet guossái viidnemuora ja fiikonmuora vuollái.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.