Ukraina flaggRedder Bibelen liv i Ukraina?
Finn ut mer
Gå til forsiden

Sakarja

6

Gávccát oainnáhus: Njealjit vovnnat

1 Go mun fas geahčastin, de mun oidnen njeljiid vovnnaid mat ihte guovtti vári gaskka. Dat várit ledje veaikevárit. 2 Vuosttaš vovnnaid gesse rukses heasttat, nuppiid čáhppes heasttat, 3 goalmmádiid vilges heasttat ja njealjádiidgis girjjat heasttat. Dat buot ledje gievrras heasttat. 4 Mun jerren eŋgelis guhte sártnui muinna: “Mat dát leat, hearrá?” 5 Eŋgel vástidii: “Dat leat almmi njeallje biekka mat vulget maŋŋil go leat čužžon oppa eatnama hearrá ovddas. 6 Dat vovnnat maid čáhppes heasttat gesset, vulget davvieatnama guvlui, dat vovnnat maid vilges heasttat gesset, vulget oarjjás ja dat vovnnat maid girjjat heasttat gesset, vulget lulás.”

7 Buot duot gievrras heasttat vuolggestuvve mannat miehtá eatnama. Son celkkii: “Mannet miehtá eatnama!” Ja dat manne miehtá eatnama. 8 Son čuorvvui munnje: “Ane muittus daid heasttaid mat vulge davás. Dat diktet mu vuoiŋŋa boahtit dohko.”

9 Hearrá sátni bođii munnje:

10 Mana Jošia, Sefanja bártni, vissui. Doppe don deaivvat Heldaja, Tobia ja Jedaja geat leat boahtán Babylonis. 11 Váldde golli ja silbba maid sii leat buktán, duddjo dain kruvnnu ja bija dan bajimusbáhppa Josua, Jehosadaka bártni, oaivái. 12 Cealkke sutnje: Ná cealká Hearrá, Almmiveagaid Ipmil: Olmmái gean namma lea Vesá, badjána dán eatnamis, ja son hukse Hearrá tempela. 13 Duođaid, son hukse Hearrá tempela, oažžu gonagasárvvu ja čohkká ráđđejeaddjin truvnnustis. Maiddái báhpas lea truvdnu, ja dan guoktá gaskkas lea ovttamielalašvuohta. 14 Báhcos kruvdnu Hearrá tempelii Heldaja, Tobia, Jedaja ja Jošia, Sefanja bártni, muitun.

15 Olbmot bohtet guhkkin hukset Hearrá tempela. Dalle dii ipmirdehpet ahte Hearrá, Almmiveagaid Ipmil, lea vuolggahan mu din lusa. Dat dáhpáhuvvá jos dii duođaid guldalehpet Hearrá, din Ipmila, jiena.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.