Allalávlla

¹ Mun lean Sarona lieđđi,

legiid lilljá.

² Dego lilljá bastilislánjáid gaskkas

lea mu ráhkis nieiddaid gaskkas.

³ Dego ehpelmuorra

vuovddi muoraid gaskkas

lea mu ustit nuorra olbmáid gaskkas.

Mun háliduvan čohkkát su suoivanis,

su šattus lea njálggat mu guopmái.

⁴ Son buvttii mu viidnevissui,

ráhkisvuođas leavgga vuolde.

⁵ Áhpásmahttet mu

viidnemuorjegáhkuiguin,

virkkosmahttet mu ehpeliiguin,

mun lean buohcci ráhkisvuođas.

⁶ Su gurut giehta lea mu oaivvi vuolde,

su olgeš giehta fátmmasta mu.

⁷ Mun vuortnuhan din,

Jerusalema nieiddat,

gasellaid ja sarvvaáldduid bokte:

Allet bovtte ráhkisvuođa,

allet muosehuhte dan

ovdal go dat ieš hálida!

⁸ Gula, ráhkkásan jietna!

Do son lea, son viehká váriid badjel,

njuiku badjel dieváid.

⁹ Mu ráhkis lea dego gasella,

son lea nugo nuorra sarvva.

Duo son čuožžu min seainni duohken,

son guovlá láseráigge,

vákšu čeargalasa čađa.

¹⁰ Mu ráhkis sárdnugoahtá.

Čuožžil, mu ráhkis, vuolgu, čábbážan!

¹¹ Dálvi lea gollan, arvvit leat vássán.

¹² Lieđit ihtet eatnamis,

lávlunáigi lea boahtán,

turtelduvvá jietna gullo min eatnamis.

¹³ Fiikonmuora šaddosat njálgot,

viidnemuoraid lieđit haksojit.

Čuožžil, mu ráhkis, vuolgu, čábbážan!

¹⁴ Mu duvvá bákteskurččuid siste,

báktestealli suojis,

čájet munnje muođuidat,

divtte mu gullat du jiena!

Du jietna lea linis

ja du hápmi nu čáppis.

¹⁵ Dohppejehket riebaniid,

riebančivggaid mat bilidit viidnegárddiid!

Min viidnegárddit leat aiddo lieđđumin.

¹⁶ Mu ráhkis lea mu ja mun lean su,

son geahččá iežas ealu liljáid gaskkas.

¹⁷ Go gáluda ja suoivanat guhkkot,

de boađe dalle, iežan ráhkis,

dego gasella, nugo nuorra sarvva

badjel váriid ja skurččuid!