Ukraina flaggUkraina trenger bibler – kan du hjelpe?
Én bibel koster kr 71
Gå til forsiden

Nubbi Mosesgirji

26

Ipmila goahti

1 Ráhkat goađi logi loavddabihtás mat leat gođđojuvvon fiinna gerdojuvvon beallemasláiggis ja ruksesalit, purpurrukses ja karmosinrukses ullus, ja herve daid čábbát kerubagovaiguin. 2 Juohke loavddabihttá galgá leat guoktelogigávcci állana guhku ja njeallje állana govddu. Buot loavddabihtáin galgá leat oktat mihttu. 3 Vihtta loavddabihttá galget biddjojuvvot oktii ja nu maid dat eará vihtta. 4 Duddjo fárffuid ruksesalit láiggis nuppi loavdaga olggumuš ravdii, ja seammá láhkái nuppi loavdaga olggumuš bihtá ravdii. 5 Daga vihttalogi fárffu vuosttaš loavdagii ja vihttalogi fárffu nuppi loavdaga ravdii, nu ahte fárffut šaddet buohtalagaid. 6 Duddjo vihttalogi golleroahki ja roahkot daiguin loavdagiid oktii, nu ahte goahti šaddá oktan.

7 Duddjo vel gáiccaguolggain loavdagiid govččasin goađi ala. Duddjo oktanuppelohkái loavddabihtá. 8 Juohke loavdda galgá leat golbmalogi állana guhku ja njeallje állana govddu. Buot loavddabihtáin galgá leat oktat mihttu. 9 Njađe vihtta loavddabihtá oktan loavddan ja guhtta loavddabihtá oktan loavddan, ja bija dan guđáda guovtte geardái goađi ovddabeallái. 10 Duddjo vihttalogi fárffu nuppi loavdaga olggumuš bihtá ravdii, ja vihttalogi fárffu nuppi loavdaga ravdii. 11 Duddjo vihttalogi bronsaroahki ja roahkot daid fárffuide, nu ahte goahti šaddá ollisin. 12 Dat oassi loavdagis mii lea liiggás ja manná goađi ravdda badjel, oažžu heaŋgát goađi duogábealde. 13 Dat állanmihttu mii goađi loavdagiin lea goappáge bealde liiggás, oažžu heaŋgát goađi goappáge beali govččasin. 14 Duddjo goahtái gokčasa ruoksadin báidnojuvvon vierccanáhkiin ja dan ala vel gokčasa delfiinnanáhkiin.

15 Ráhkat goahtái fielluid akasiamuoras ja bija daid ceaggut. 16 Juohke fiellu galgá leat logi állana guhku ja beannot állana govddu. 17 Juohke fiellus galget leat guokte návlli mat leat lahkalagaid. Ráhkat buot goađi fielluid dakkárin. 18 Ráhkat guoktelogi fiellu goađi lulleseaidnái, lulás guvlui. 19 Ráhkat njealljelogi silbajuolggi dan guovttelogi fiellu vuollái; guđege fiellu vuollái guokte juolggi maidda návllit heivejit. 20 Ráhkat maiddái goađi nuppi seaidnái, davás guvlui, guoktelogi fiellu 21 ja njealljelogi silbajuolggi, guokte juolggi guđege fiellu vuollái. 22 Ráhkat goađi duogábeallái, oarjjás guvlui, guhtta fiellu. 23 Ráhkat guokte fiellu goađi čiegaide, duogábeallái. 24 Dát fiellut galget leat guovttegeardái vuolil ja guovttegeardái bajil gitta vuosttaš rieggá rádjái. Guktot čiehkafiellut galget leat dákkárat. 25 Das leat nappo gávcci fiellu ja daidda guhttanuppelohkái silbajuolggi, guokte juolggi guđege fiellu vuolde.

26 Duddjo akasiamuoras vihtta doaresmuora goađi nuppi seainni fielluide 27 ja vihtta doaresmuora goađi nuppi seainni fielluide ja vihtta doaresmuora goađi duogábeallái, oarjjás guvlui. 28 Gaskkamuš doaresmuorra mii lea fielluid gaskkamuttos, galgá mannat miehtá seainni geažis geahčái. 29 Skoađas fielluid golliin, duddjo gollis daid rieggáid maidda doaresmuorat nahkehuvvojit, ja skoađas maiddái doaresmuoraid golliin. 30 Cegge goađi aiddo dainna vugiin mii dutnje čájehuvvui váris.

31 Duddjo ovdaloavdaga ruksesalit, purpurrukses ja karmosinrukses ullus ja fiinna gerdojuvvon beallemasláiggis ja herve dan čábbát kerubagovaiguin. 32 Heŋge dan njealji akasiamuorrastolpui mat leat skoađastuvvon golliin, ja main leat gollefakkit ja mat čužžot njealji silbajuolggi veagas. 33 Heŋge ovdaloavdaga rohkiide ja doalvvo lihtumearkka árkka ovdaloavdaga siskkobeallái. Ovdaloavdda lea didjiide gaskaseaidni bassi boaššu ja basimus boaššu gaskkas. 34 Bija soabahussaji lihtumearkka árkka ala, mii lea basimus boaššus.

35 Bija beavddi ovdaloavdaga olggobeallái ja lámpájuolggi beavddi buohta goađi lulleseainni vuostá; bija beavddi davveseainni vuostá. 36 Duddjo goahteuksii gokčasa ruksesalit, purpurrukses ja karmosinrukses ullus ja fiinna gerdojuvvon beallemasláiggis, čáppa hearvaduodjin. 37 Duddjo gokčasii vihtta stoalppu akasiamuoras ja skoađas daid golliin. Stoalppuid fakkit galget leat gollis. Leike stoalppuid várás vihtta bronsajuolggi.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.