Ukraina flaggRedder Bibelen liv i Ukraina?
Finn ut mer
Gå til forsiden

Jeremia

33

Israel huksejuvvo ođđasis

1 Jeremiai bođii vel nuppádassii Hearrá sátni, go son lei ain fáŋgan fáktašiljus: 2 Ná cealká Hearrá: Mun lean sivdnidan ja hábmen ja vuođđudan eatnama, danin go mun lean Hearrá. 3 Čuorvvo munnje, de mun vástidan dutnje ja dieđihan dutnje stuorra ja imaš áššiid maid don it dovdda. 4 Mun, Hearrá, Israela Ipmil, cealkkán dutnje ná: Fallehangorgŋehagat ja kaldealaččaid miehkki duššadit dán gávpoga viesuid ja Juda gonagasaid šloahtaid. 5 Gávpoga ássit sohtet kaldealaččaiguin, muhto duššás – sin viesuid dievva šaddet rupmašat. Suhtustan ja moaristan mun časkkán jámas Jerusalema ássiid. Sin bahávuođa dihte mun in šat geahča dán gávpoga beallái. 6 Muhto vel oktii mun divttán dan háviid savvot, mun dálkkodan ja buoridan sin ja attán sidjiide valljugas muosi ja oadjebasvuođa. 7 Mun jorgalan Juda ja Israela vuorbbi ja huksen daid dakkárin go dat ledje dolin. 8 Mun buhtistan daid ássiid buot suttuin maiguin sii leat rihkkon mu vuostá. Sii leat suddudan ja rihkkon mu vuostá, muhto mun attán ándagassii buot sin bahás daguid. 9 Dát gávpot šaddá munnje illun, rámádussan ja gudnin, go buot eatnama álbmogat gullet buot daid buriid maid mun dagan iežan álbmogii. Álbmogat hirpmahuvvet ja dorggiidit buot dan buori dihte ja buot dan lihku dihte maid mun attán Jerusalemii.

10 Ná cealká Hearrá: Dii dadjabehtet: “Dát eanan lea ávdin, dáppe eai leat olbmot eaige eallit.” Nu leage: Juda gávpogat ja Jerusalema gáhtat leat ávdimin, doppe eai leat olbmot, eai ássit eaige eallit. 11 Muhto oktii velá dáppe gullo ávvučuorvvas ja illučuorvvas, irggi jietna ja moarsi jietna, daid čuorvvas geat dadjet: “Giitet Hearrá, Almmiveagaid Ipmila, dasgo son lea buorre, su árbmu bistá agálaččat,” ja daid jietna geat buktet giittusoaffariid Hearrá vissui. Mun jorgalan dán eatnama vuorbbi, nu ahte dat šaddá dakkárin go dat lei dolin, cealká Hearrá.

12 Ná cealká Hearrá, Almmiveagaid Ipmil: Dát báiki šaddá ávdimin, nu ahte dáppe eai leat olbmot eaige eallit. Muhto boahtá vel áigi go dán eatnama gávpogiid birra leat fas guohtuneatnamat, ja guođoheaddjit livvadahttet dain sávzzaideaset. 13 Juda várreeatnama gávpogiin, Šefela ja Negeva gávpogiin, Benjamina eatnamis, Jerusalema guovllus ja Juda gávpogiin leat eatnat sávzzat, ja sávzageahččit lohket eahkedis daid logu, cealká Hearrá.

Hearrá ii hilggo Davida náli

14 Bohtet beaivvit go mun ollašuhtán dan buori lohpádusa maid mun adden Israela ja Juda čearddaide, cealká Hearrá. 15 Go dat áigi ja dat beaivi boahtá, de mun divttán vanhurskkis vesá bohciidit Davida nális. Son dahká rievtti ja vuoigatvuođa eatnamis. 16 Daid beivviid Juda bestojuvvo ja Jerusalem ássá oadjebassan. Ja son gohčoduvvo dáinna namain: “Hearrá lea min vanhurskkisvuohta.” 17 Ná cealká Hearrá: Israela truvnnus čohkká álo Davida soga olmmái, 18 ja levilaš báhpat oaffaruššet munnje álohii boaldinoaffariid ja borramušoaffariid ja lágidit munnje njuovvanoaffariid.

19 Jeremiai bođii dát Hearrá sátni: 20 Ná cealká Hearrá: Jos dii veadjibehtet doadjit mu lihtu beivviin ja ijain, nu ahte ii šatta beaivi ja idja iežas áigái, 21 de dalle doddjojuvvo maiddái mu lihttu bálvaleddjiinan Davidiin, nu ahte sus ii leat šat bárdni čohkkámin su truvnnus, ja doddjojuvvo maiddái mu lihttu levilaš báhpaiguin geat bálvalit mu. 22 Nugo almmi násttit eai leat lohkamis eaige meara sáddot mihtideames, nu eatnagin mun dagan bálvaleaddján Davida náli ja levilaččaid geat bálvalit mu.

23 Jeremiai bođii dát Hearrá sátni: 24 Almma don leat fuobmán maid dát álbmot sárdnu? Sii dadjet: “Hearrá lea hilgon dan guokte čeardda maid válljii.” Ja sii badjelgehččet mu álbmoga, danne go sii eai ane dan šat álbmogin. 25 Muhto mun, Hearrá, cealkkán ná: Seammá vissis go dat ahte lean dahkan lihtu beivviin ja ijain, ahte lean ásahan lágaidan albmái ja eatnamii, 26 seammá vissis lea ahte mun in hilggo Jakoba inge bálvaleaddján Davida náli. Mun válljen su nális gonagasa ráđđet Abrahama, Isaka ja Jakoba náli. Mun jorgalan sin vuorbbi ja árpmihan sin.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.