David viežžá árkka
1 Go David lei ráđđádallan duháhaoaivámuččaiguin ja čuohtásaoaivámuččaiguin, juohke oaivámuččain, 2 de son dajai israellaččaide geat ledje čoagganan Hebronii: “Jos din mielas orru buorre ja jos Hearrá, min Ipmil, suovvá, de biddjot sáni buot vieljaidasamet miehtá Israela ja maiddái báhpaide ja levilaččaide geat ásset iežaset gávpogiin ja daid biraseatnamiin, ahte sii čoagganivčče min lusa. 3 Vižžot dasto deike Ipmileamet árkka maid mii hilggodeimmet Saula áigge.” 4 Buohkat geat ledje čoagganan, dadje ahte nu galggai dahkat. Dasgo buohkaid mielas dat orui riekta.
5 Dalle David čohkkii oppa Israela, Egypta Šihora rájes gitta Lebo-Hamata rádjái, viežžat Ipmila árkka Kirjat-Jearimis. 6 De son ovttas oppa Israeliin vulggii Baalai dahjege Kirjat-Jearimii, mii gullá Judai. Doppe son áiggui viežžat Ipmila árkka man badjelii Hearrá namma lei celkojuvvon, su gean truvnnu kerubat guddet. 7 Sii válde Ipmila árkka Abinadaba viesus ja bidje dan ođđa vovnnaide maid Ussa ja Ahjo stivriiga. 8 David ja oppa Israel dánso ilus Ipmila muođuid ovddas, lávlo ja čuojahedje lyraid, hárppaid, rumbbuid, symbálaid ja trompehtaid.
9 Go sii bohte Kidona gordneráidnenbáikái, de vuovssát šadde vearrájin, ja Ussa geigii gieđa ja áiggui dollet árkka. 10 Dalle Hearrá moaráhuvai Ussai. Son časkkii Ussa, danne go son lei guoskan árkii, ja nu Ussa jámii dasa Ipmila ovdii. 11 David gáfestuvai go Hearrá lei časkán Ussa jámas. David gohčui dan báikki Peres Ussan, ja danin dat gohčoduvvo veláge.
12 David ballái Hearrás, ja son dajai: “Mo mun veajášin buktit Ipmila árkka iežan lusa?” 13 Danin son ii buktán árkka Davida gávpogii, muhto bijai dan gatlaš Obed-Edoma vissui. 14 Ipmila árka lei Obed-Edoma luhtte golbma mánu, ja Hearrá buressivdnidii Obed-Edoma bearraša ja buot mii sus lei.