Vuosttaš Muitalusaid girji

Davida soađit

¹ Das maŋŋil David časkkii ja vuolidii filistalaččaid ja válddii sis Gata ja dan birasbáikkiid. ² Son časkkii maiddái moablaččaid. Sii šadde su šlávvan ja gárte máksit sutnje vearu. ³ Dasto David vulggii viiddidit válddis gitta Eufrata rádjái, ja dalle son vuittii Hadadesera, Soba gonagasa, Hamata luhtte. ⁴ David válddii sus duháhiid vovnnaid, čiežaduhát vovdnasoahteolbmá ja guoktelogiduhát vázzi soahteolbmá. Heasttaid son guđii čuođi, muhto buot vovdnaheasttaid čeavžesuonaid son čuohpai. ⁵ Go Damaskusa aramealaččat bohte veahkehit Hadadesera, Soba gonagasa, de David časkkii sin ja gottii guoktelogiguokteduhát olbmá. ⁶ David bijai fálddiid Damaskusa aramealaččaid eatnamii. Sii šadde su vuložin ja gárte máksit sutnje vearu. Hearrá veahkehii Davida juohke sajis, gosa son ain manai. ⁷ David válddii Hadadesera olbmáid gollenjuollaskuohpuid ja buvttii daid Jerusalemii. ⁸ Tibhatis ja Kunis, Hadadesera gávpogiin, son válddii ollu veaikki. Das Salomo duddjui bronsameara, bronsabácciid ja bronsalihtiid.

⁹ Go Tou, Hamata gonagas, gulai ahte David lei časkán Soba gonagasa Hadadesera oppa soahteveaga, ¹⁰ de son vuolggahii bártnis Hadorama dearvvahit gonagas Davida ja sávvat sutnje lihku, danne go son lei vuoitán Hadadesera; Hadadeser lei oainnat leamaš Tou vuostálasti. Hadoram buvttii buotlágán golle-, silba- ja veaikelihtiid, ¹¹ ja David basuhii daid Hearrái oktanaga dainna silbbain ja golliin maid son lei váldán eará álbmogiin, edomlaččain, moablaččain, ammonlaččain, filistalaččain ja amaleklaččain. ¹² Abišai, Seruja bárdni, časkkii Sálteleagis gávccinuppelotduhát edomlačča. ¹³ David bijai Edomii soahteveagaid, ja buot edomlaččat šadde su šlávvan. Nie Hearrá veahkehii Davida juohke sajis gosa son ain manai.

¹⁴ David ráđđii dál oppa Israela, ja son doaimmahii álbmogasas vuoigatvuođa ja rievtti. ¹⁵ Joab, Seruja bárdni, lei soahteveagaoaivámužžan, ja Jošafat, Ahiluda bárdni, lei riikkačállin. ¹⁶ Sadok, Ahituba bárdni, ja Ahimelek, Ebjatara bárdni, leigga báhppan, ja Šavša lei gonagasa čállin. ¹⁷ Benaja, Jojada bárdni, lei keretlaččaid ja peletlaččaid oaivámužžan, ja Davida bártnit ledje gonagasa ráđđeaddin.