Paulusa vuosttaš girji korintalaččaide

Nissonat searvegottis

² Mun rámidan din go dii álo muitibehtet mu ja doallabehtet daid oahpahusaid maid mun lean ovddidan didjiide. ³ Dii fertebehtet diehtit ahte Kristus lea juohke olbmá oaivi, olmmái lea nissona oaivi ja Ipmil lea Kristusa oaivi. ⁴ Jos olmmái rohkadallá dahje profehtastallá gahpir oaivvis, de son heahppášuhttá oaivvis. ⁵ Muhto jos nisson rohkadallá dahje profehtastallá rabas oivviid, de son heahppášuhttá oaivvis, dasgo dat lea seammá go son livččii čuohpahan vuovttaidis. ⁶ Jos nisson ii govčča iežas oaivvi, de son sáhttá seammá bures čuohpahit vuovttaidis. Muhto jos nissonii lea heahpadin čuohpahit vuovttaidis dahje ráhkehit oaivvis, de son galgá gokčat oaivvi. ⁷ Olmmái ii oaččo gokčat oaivvi, danne go son lea Ipmila govva ja gudni, muhto nisson lea olbmá gudni. ⁸ Dasgo olmmái ii boahtán nissonis, muhto nisson olbmás, ⁹ iige olmmái sivdniduvvon nissona dihte, muhto nisson olbmá dihte. ¹⁰ Danne nisson galgá atnit oaivvis vuoigatvuođa mearkka eŋgeliid dihte. ¹¹ Hearrá siste ii almmatge leat nisson almmá olbmá haga iige olmmái almmá nissona haga, ¹² danne go nugo nisson lea boahtán olbmás, nu olmmáige lea riegádan nissonis. Muhto buot lea boahtán Ipmilis.

¹³ Árvalehket ieža: Heivego ahte nisson rohkadallá Ipmila gahperkeahttá? ¹⁴ Almma luonduge oahpaha didjiide ahte olbmái guhkes vuovttat leat heahpadin, ¹⁵ muhto nissonii gudnin. Guhkes vuovttat leat addojuvvon nissonii suokkan. ¹⁶ Jos muhtumis lea miella nágget vuostá, de mun dajan sutnje ahte ii mis iige Ipmila searvegottiin muđuige leat eará vierru.

Hearrá bassi mállásat

¹⁷ Go mun attán dáid neavvagiid, de mun ferten cuiggodit din das ahte din čoagganeamit leat didjiide ovdal vahágin go buorrin. ¹⁸ Vuosttažettiin mun lean gullan ahte searvegotti čoagganemiin dis lea soahpameahttunvuohta, ja muhtun muddui mun dan jáhkánge. ¹⁹ Din gaskkas gal fertejit leat sierrasearvvit, vai šaddá almmusin, guđemuččaide dis sáhttá luohttit. ²⁰ Din čoagganeamit eai leat Hearrá mállásiid rievttes návddašeamit, ²¹ danne go juohkehaš borrá iežas borramušaid, ja nu nubbi nealgu ja nubbigis juhkaluvvá. ²² Ehpetgo dii sáhte borrat ja juhkat ruovttus? Vai badjelgeahččabehtetgo dii Ipmila searvegotti go heahppášuhttibehtet daid geain ii leat maid borrat? Maid mun galggašin dadjat didjiide? Galggašingo mun rábmot din? Dán áššis mun in din rábmo.

²³ Mun lean ožžon Hearrás dan maid lean maiddái oahpahan didjiide: Hearrá Jesus, dan ija go son behttojuvvui, válddii láibbi, ²⁴ giittii Ipmila, doadjalii láibbi ja celkkii: “Dát lea mu rumaš mii addojuvvo din ovddas. Dahket dán, vai muitibehtet mu.” ²⁵ Seammá láhkái son válddii geara mállásiid maŋŋil ja celkkii: “Dát gearra lea ođđa lihttu mu varas. Nu dávjá go dii dan juhkabehtet, de dahket dan, vai muitibehtet mu.”

²⁶ Nu dávjá go dii borrabehtet dán láibbi ja juhkabehtet dán geara, de dii gulahehpet Hearrá jápmima, dassážii go son boahtá. ²⁷ Danne dat gii borrá dán láibbi ja juhká Hearrá geara dohkkemeahttumit, sudduda Hearrá rupmaša ja vara vuostá. ²⁸ Guorahallos juohkehaš iežas, ovdal go borrá dán láibbi ja juhká dán geara. ²⁹ Gii borrá ja juhká iige jurddaš ahte dat lea Jesusa rumaš, dat borrá ja juhká alccesis duomu. ³⁰ Dan dihte din gaskkas leat ollu heajut ja buohccit, ja eatnagat leat juo oađđán jápmimii. ³¹ Jos mii guorahalašeimmet iežamet, de mii eat dubmejuvvoše. ³² Go Hearrá dubme min, de dat lea midjiide bagadussan, vai mii eat dubmejuvvo oktanaga máilmmiin.

³³ Vieljažiiddán, go dii nappo čoagganehpet boradit, de vurdet guhtet guimmiideattet. ³⁴ Jos muhtun nealgu, de son galgá boradit ruovttus, vai din čoagganeamit eai buvtte didjiide duomu. Eará áššiin mun neavvun din dalle go boađán.