Paulusa vuosttaš girji korintalaččaide

Bassi Vuoiŋŋa attáldagat

¹ Vieljažiiddán, mun dáhtun ahte dis lea diehtu Vuoiŋŋa attáldagaid birra. ² Almma muitibehtet mo dii geasáhalaidet gielahis eahpeipmiliid lusa dalle go ain leiddet báhkinat? ³ Dan dihte mun cealkkán čielgasit didjiide ahte ii oktage gii sárdnu Ipmila Vuoiŋŋas, sáhte dadjat: “Jesus lea garuhuvvon.” Iige oktage sáhte dadjat: “Jesus lea Hearrá”, earret go Bassi Vuoiŋŋas.

⁴ Árpmuattáldagat leat máŋggaláganat, muhto Vuoigŋa lea seammá. ⁵ Bálvalusdoaimmat leat máŋggaláganat, muhto Hearrá lea seammá. ⁶ Fámolaš dagut leat máŋggaláganat, muhto Ipmil lea seammá, son guhte duddjo buot ja buohkaid siste. ⁷ Juohkehažžii Vuoigŋa almmustuvvá nu ahte šaddá ávkin. ⁸ Ovtta ja seammá Vuoiŋŋa fámus nubbi oažžu máhtu gaskkustit viisodaga, nubbigis máhtu gaskkustit dieđu, ⁹ nubbái seammá Vuoigŋa addá oskku fámu, nubbáigis árpmuattáldaga buoridit, ¹⁰ muhtun oažžu fámu dahkat oavdudaguid, muhtun oažžu attáldaga profehtastallat, muhtun fas máhtu earuhit vuoiŋŋaid, muhtun attáldaga sárdnut gielaiguin, ja muhtun fas máhtu dulkot dakkár sárdnuma. ¹¹ Buot dáid duddjo okta ja seammá Vuoigŋa gii juogada iešguhtiige su iežas attáldagaid nugo dáhttu.

Okta rumaš, máŋga lahtu

¹² Kristus lea nugo olbmorumaš mii lea okta ollisvuohta, muhto mas leat ollu lahtut; vaikko lahtut leat ollu, de dat almmatge ráhkadit ovtta rupmaša. ¹³ Mii buohkat, leaččaimet dal juvddálaččat dahje greikalaččat, šlávat dahje friddja olbmot, leat gásttašuvvon oktan rumašin. Okta ja seammá Vuoigŋa lea dahkan min oktan, mii buohkat leat ožžon juhkat seammá Vuoiŋŋa.

¹⁴ Rupmaša ii ráhkat dušše okta lahttu, muhto máŋga. ¹⁵ Jos juolgi dajašii: “Go mun in leat giehta, de mun in gula rupmašii”, de dat liikká gullá rupmašii. ¹⁶ Jos beallji dajašii: “Go mun in leat čalbmi, de mun in gula rupmašii”, de dat liikká gullá rupmašii. ¹⁷ Jos oppa rumaš livččii dušše čalbmi, de gos dalle livččii gullu? Jos dat livččii dušše gullu, de gos dalle livččii haksin? ¹⁸ Muhto Ipmil lea bidjan rupmašii buot sierra lahtuid nugo lea atnán buorrin. ¹⁹ Jos buot livččii okta ja seammá lahttu, gos dalle livččii rumaš? ²⁰ Muhto dál leat ollu lahtut, muhto dušše okta rumaš.

²¹ Čalbmi ii sáhte dadjat gihtii: “Mun in dárbbaš du”, iige oaivi julggiide: “Mun in dárbbaš dudno.” ²² Jergo jorgut, aiddo dat rumašlahtut mat min mielas orrot leamen heajumusat, leat dárbbašlaččat. ²³ Mii addit eambbo gudni daidda rumašlahtuide maid eat ane beare gutnálažžan, ja gokčat hui šigolaččat daid rumašlahtuid main heahpanaddat. ²⁴ Šigolaš rumašlahtuid ii leat dárbbašlaš gokčat. Go Ipmil bijai lahtuid rumašin, de son attii heajut lahtuide eambbo gudni, ²⁵ vai rupmašis ii leat soahpameahttunvuohta, muhto lahtut atnet fuola guhtet guimmiineaset. ²⁶ Jos okta lahttu gillá, de buot lahtut gillájit. Jos okta lahttu gudnejahttojuvvo, de buot lahtut illudit oktan dainna.

²⁷ Dii lehpet Kristusa rumaš, ja iešguhtege dis lea dán rupmaša lahttu. ²⁸ Ipmil lea bidjan girkui vuosttažettiin muhtumiid apostalin, nuppádassii muhtumiid profehtan ja soapmásiid oahpaheaddjin. Muhtumiidda son lea addán fámu dahkat oavdduid, earrásiiddagis attáldaga buoridit, máhtu veahkehit nuppiid, máhtu bargat jođiheaddjin dahje máhtu sárdnut gielaiguin. ²⁹ Eai suige buohkat leat apostalat? Eai suige buohkat leat profehtat dahje oahpaheaddjit? Dahketgo buohkat oavdduid? ³⁰ Ii suige buohkain leat attáldat buoridit? Eai suige buohkat sártno gielaiguin dahje dulko dakkár sárdnuma? ³¹ Muhto váinnuhehket stuorimus árpmuattáldagaid.

Dál mun čájehan didjiide buot buoremus geainnu.