Paulusa vuosttaš girji korintalaččaide

Profehtastallan ja gielaiguin sárdnun

¹ Váinnuhehket ráhkisvuođa, muhto bivdet maiddái vuoiŋŋalaš attáldagaid, ovddimustá profehtastallanattáldaga. ² Dasgo dat gii sárdnu gielaiguin, ii sártno olbmuide, muhto Ipmilii. Ii oktage ádde su, danne go Vuoigŋa diktá su sárdnut čiegusvuođaid. ³ Muhto dat gii profehtastallá, sárdnu olbmuide: Son arvvosmahttá, ávžu ja jeđđe. ⁴ Dat gii sárdnu gielaiguin, ráhkada iežas, muhto dat gii profehtastallá, ráhkada searvegotti. ⁵ Mun sávan ahte dii buohkat sártnošeiddet gielaiguin, muhto vel eambbo mun sávan ahte dii profehtastalašeiddet. Dat gii profehtastallá, lea stuorit go dat gii sárdnu gielaiguin, jos son ii dulko dan maid sárdnu, vai dat ráhkada searvegotti.

⁶ Vieljažiiddán, mii ávkkiid lea didjiide jos mun boađán din lusa ja sártnun gielaiguin, inge buvtte almmustusa dahje atte didjiide dieđu, profetia dahje oahpahusa? ⁷ Seammá ládje lea maid jápma čuojanasaiguin, nugo njurgganasain dahje hárppain. Mo olmmoš dovdá nuohta mii čuojahuvvo njurgganasain ja hárppain, jos nuohtain ii leat erohus? ⁸ Ja jos soahtedorve addá čielggasmeahttun jiena, de gii dalle ráhkkana soahtái? ⁹ Nu lea maid dinguin: Jos din njuovčča ii sártno sániid maid olmmoš ádde, de mo nubbi sáhttá ipmirdit dan mii daddjojuvvo? Dalle din sánit jávket almmi biekkaide. ¹⁰ Máilmmis leat máŋggalágaš gielat, ja buot dat leat áddehahttit. ¹¹ Muhto jos mun in ádde maid sárdnun mearkkaša, de mun lean amas dasa gii sárdnu, ja son lea amas munnje.

¹² Go dii dalle váinnuhehpet Vuoiŋŋa attáldagaid, de oččodehket daid valljugasat, vai searvegoddi gievru. ¹³ Rohkadallos dat gii sárdnu gielaiguin, alccesis maiddái dulkonmáhtu. ¹⁴ Jos mun rohkadalan gielaiguin, de mu vuoigŋa gal rohkadallá, muhto mu jierbmái das ii leat ávki. ¹⁵ Maid dat mearkkaša? Mun ferten rohkadallat vuoiŋŋainan, muhto maiddái jirpmiinan; mun ferten lávlut ávvulávlagiid vuoiŋŋainan, muhto maiddái jirpmiinan. ¹⁶ Jos don rámidat Ipmila dušše vuoiŋŋainat, mo de olggobealolmmoš gii lea das, sáhttá dadjat “amen” du giittusrohkosii, go son ii ádde maid don sártnut? ¹⁷ Don gal giittát bures, muhto nubbi ii ane das ávkki. ¹⁸ Mun sártnun gielaiguin eambbo go dis oktage, ja mun giittán das Ipmila. ¹⁹ Muhto vai sáhtán oahpahit earáid, de mun searvegottis dáhtun sárdnut ovdal vihtta sáni mat leat áddemis, go gielaiguin duhát sáni maid guldaleaddjit eai ádde.

²⁰ Vieljažiiddán, alloset din jurdagat lehko mánáid jurdagat. Bahávuođa dáfus dis gal ožžot leat mánáid jurdagat, muhto jierpmi dáfus ollesolbmuid. ²¹ Lágas daddjojuvvo: Amas gillii ja vierrásiid baksamiiguin mun sártnun dán álbmogii, muhto dat ii dattetge guldal mu, cealká Hearrá. ²² Amas gielat eai leat mearkan oskkolaččaide, muhto daidda geat eai oskko; muhto profehtalaš sárdnun ii leat mearkan eahpeoskkolaččaide, muhto daidda geat oskot. ²³ Jos dal searvegotti oktasaš čoagganeamis buohkat sártnošedje gielaiguin, ja de dasa boađášedje olggobealolbmot dahje eahpeoskkolaččat, de almmá sii dalle dajašedje ahte dii lehpet mielahuvvan? ²⁴ Muhto jos buohkat profehtastallet ja dasa boahtá muhtun eahpeoskkolaš dahje olggobealolmmoš, ja buohkat cuiggodišgoađášedje ja guorahallagoađášedje su daguid, ²⁵ de su siskkimuš jurdagat boađášedje albmosii. Dalle son luoitádivččii muđolassii, rohkadalašii Ipmila ja dovddastivččii: “Ipmil lea duođaid din gaskkas.”

Rávvagat searvegotti čoagganemiid várás

²⁶ Vieljažiiddán, maid dát dalle mearkkaša? Go dii čoagganehpet, de juohkehaččas lea juoga maid addit: sálbma, oahpahus, almmustus, gielaiguin sárdnun ja dan dulkon. Buot galgá šaddat oktasaš ávkin. ²⁷ Jos muhtun sárdnu gielaiguin, de dušše guovttis dahje eanemusat golmmas ožžot sárdnut, okta ain hávil, ja muhtun galgá dulkot. ²⁸ Jos das ii leat olmmoš gii máhttá dulkot, de orros dat gii sárdnu, jávohaga searvegotti čoagganeames ja sárdnos dušše alccesis ja Ipmilii. ²⁹ Profehtain ožžot guovttis dahje golmmas profehtastallat, ja nuppit árvvoštalloset. ³⁰ Muhto jos muhtun eará gii lea das, oažžu almmustusa, de ovddit sárdnu galgá jávohuvvat. ³¹ Dii buohkat oažžubehtet profehtastallat, iešguhtege iežas vuorus, vai buohkat ohppet ja arvvosmuvvet. ³² Profehtaid vuoiŋŋat leat profehtaide vuolibuččat, ³³ danne go Ipmil ii leat moivvi muhto ráfi Ipmil.

Nugo buot bassi olbmuid searvegottiin, ³⁴ de nissonat galget orrut jávohaga searvegotti čoagganemiin. Sii eai oaččo sárdnut, muhto galget orrut vuolibužžan, nugo maiddái láhka cealká. ³⁵ Jos sii dáhttot oažžut čielgasa juoga mas nu, de jerroset boatnjisteaset ruovttus, danne go heivemeahttun lea nissoniidda sárdnut searvegottis. ³⁶ Din luhttego Ipmila sátni lea vuolgán? Dahje dušše din lusago dat lea boahtán?

³⁷ Jos muhtun navdá leat profehta, dahje ahte lea ožžon eará Vuoiŋŋa attáldagaid, de son ferte diehtit ahte dat maid mun čálán, lea Hearrá gohččun. ³⁸ Jos muhtun ii dan dohkket, de su ii Ipmil dohkket. ³⁹ Dan dihte, vieljažiiddán, váinnuhehket profehtastallanattáldaga, alletge hehtte sárdnumis gielaiguin. ⁴⁰ Muhto visot ferte šaddat heivvolaččat ja siivvut.