Paulusa ovddit doaibma Korintas
1 Go mun bohten din lusa, vieljažiiddán, de mun in sárdnidan didjiide Ipmila čiegusvuođa earenoamáš sárdnundáidduin dahje viisodagain. 2 Mun ledjen mearridan ahte din luhtte in dáhto diehtit maidege earret Jesus Kristusa, russiinávlejuvvon Kristusa. 3 Go mun ledjen din luhtte, de mun ledjen headju, baleš ja áŧestuvvan. 4 Mu sáhka ja mu sárdni ii viggan jáhkihit olmmošlaš viisodagain, muhto čájehii Vuoiŋŋa fámu, 5 vai din osku ii vuođđuduva olbmuid viisodahkii, muhto Ipmila fápmui.
Olbmuid viisodat ja Ipmila viisodat
6 Mii sárdnidit viisodaga olbmuide geat leat vuoiŋŋalaččat rávásmuvvan, eat dattetge dán máilmmi viisodaga eatge dán máilmmi nohkavaš oaivámuččaid viisodaga. 7 Mii sárdnidit čiegusvuođa, Ipmila čihkkojuvvon viisodaga maid Ipmil ovdal áiggiid álggu lea mearridan min hearvásvuohtan. 8 Ii oktage dán máilmmi oaivámuččain leat dan dovdan, danin go jos sii livčče dan dovdan, de sii eai livčče russiinávlen hearvásvuođa Hearrá. 9 Mii sárdnidit, nugo lea čállojuvvon, dan maid ii oktage čalbmi leat oaidnán iige oktage beallji gullan, mii ii leat badjánan ovttage olbmo váibmui ja maid Ipmil lea gárvvistan daidda geat ráhkistit su. 10 Dán lea Ipmil almmuhan midjiide Vuoiŋŋa bokte, dasgo Vuoigŋa suokkarda buot, maiddái Ipmila čieŋalvuođaid.
11 Gii eará go olbmo iežas vuoigŋa diehtá mii lea olbmo siste? Seamma láhkai dušše Ipmila Vuoigŋa diehtá mii lea Ipmila siste. 12 Mii eat leat ožžon máilmmi vuoiŋŋa, muhto dan Vuoiŋŋa mii boahtá Ipmilis, vai mii áddešeimmet dan maid Ipmil lea addán midjiide árpmustis. 13 Das mii maiddái sárdnut, muhto mii atnit sániid maid midjiide lea oahpahan Vuoigŋa iige olmmošlaš viisodat, ja dulkot vuoiŋŋalaš áššiid Vuoiŋŋa vehkiin. 14 Ii olmmoš iešalddes sáhte váldit vuostá dan mii boahtá Ipmila Vuoiŋŋas, danne go son atná dan jallavuohtan. Son ii sáhte áddet dan, danne go dan ferte árvvoštallat vuoiŋŋalaččat. 15 Vuoiŋŋalaš olmmoš gal máhttá suokkardit visot, muhto son ieš ii leat geange suokkardeames. 16 Dasgo Gii dovdá Hearrá miela, nu ahte máhtášii neavvut su? Muhto mis lea Kristusa miella.