Lágasteamit kristtalaččaid gaskkas
1 Go dis soapmásis lea ášši guoimmis vuostá, de mo son jolggada lágastit báhkiniid ovddas? Manne son ii divtte bassi olbmuid čoavdit ášši? 2 Almma diehtibehtet ahte bassi olbmot oktii dubmejit máilmmi? Jos dii oažžubehtet dubmet máilmmi, de almma dii dalle máhttibehtet čoavdit smávva áššiid? 3 Almma diehtibehtet ahte mii oktii dubmet velá eŋgeliidge – manne mii dalle eat máhtáše čoavdit beaivválaš áššiid? 4 Muhto go dis leat dakkár beaivválaš áššit, de dii váldibehtet duopmárin olbmuid geaid searvegoddi ii ane árvvus. 5 Seađášeiddet heahpanit! Iigo din iežadet searvvis leat oktage viissis gii máhtášii čoavdit vieljažiid ášši? 6 Muhto viellja lágasta vieljas vuostá, velá eahpeoskkolaččaid ovddas. 7 Datge lea didjiide heahpadin go dis leat diggeáššit guhtet guimmiideattetguin. Manne ehpet baicca gillá veriid? Manne ehpet baicca vuoittáhala nubbái? 8 Muhto dál dii verrošehpet ja váldibehtet earáin, velá iežadet vieljainge. 9 Almma diehtibehtet ahte vuoigatmeahttun olbmot eai árbe Ipmila riikka? Allet čádjádala! Ipmila riikka eai árbe furrošeaddjit eaige eahpeipmiliid bálvaleaddjit, eai náittosrihkkut, eai olbmát geat veallájit olbmáiguin, 10 eai suollagat eaige ruhtaváibmilat, eai juhkkit, bilkárat eaige rievvárat. 11 Dii leiddet ovdal dakkárat, muhtumat dis, muhto dál dii lehpet bassojuvvon buhtisin ja dahkkojuvvon bassin ja vanhurskkisin Hearrá Jesus Kristusa nammii ja min Ipmila Vuoiŋŋa fámuin.
Rumaš lea Bassi Vuoiŋŋa tempel
12 Buot lea munnje lobálaš, muhto ii buot leat ávkkálaš. Buot lea munnje lobálaš, muhto in mun oaččo diktit mange ráđđet iežan. 13 Borramuš lea čoavjji várás ja čoavji borramuša várás, muhto Ipmil dahká duššin goappašagaid. Rumaš ii leat furrošeami várás muhto Hearrá várás, ja Hearrá lea rupmaša várás. 14 Ipmil lea čuoččáldahttán jábmiid luhtte Hearrá ja čuoččáldahttá fámuinis minge. 15 Almma diehtibehtet ahte din rupmašat leat Kristusa rupmaša lahtut? Riemašingo mun dalle dahkat Kristusa lahtuid fuorá lahttun? In goassege! 16 Almma diehtibehtet ahte dat gii ovttastuvvá fuoráin, šaddá oktan rumašin suinna? Lea celkojuvvon: Dat guovttis šaddaba oktan oažžin. 17 Muhto dat gii ovttastuvvá Hearráin, šaddá suinna oktan vuoigŋan.
18 Báhtarehket furrošeamis! Buot eará suttut maid olmmoš dahká, leat rupmaša olggobealde, muhto furrošeaddji sudduda iežas rupmaša vuostá. 19 Almma diehtibehtet ahte din rumaš lea Bassi Vuoiŋŋa tempel? Dán Vuoiŋŋa Ipmil lea addán ássat din siste. Dii ehpet gula alcceseattet. 20 Ipmil lea oasttán din ja haddi lea máksojuvvon. Gudnijahttet dan dihte Ipmila din rupmašiin.