Báhkinlaš oaffarbiergu
1 Go lea sáhka eahpeipmiliidda oaffaruššojuvvon bierggus, de dan áššis mis buohkain lea diehtu. Diehtu čeavluda, muhto ráhkisvuohta duddjo buori. 2 Jos muhtin navdá diehtit juoidá, de sus ii vel leat albma diehtu. 3 Muhto gii ráhkista Ipmila, su Ipmil dovdá.
4 Go lea sáhka das ahte oažžut borrat bierggu mii lea oaffaruššojuvvon eahpeipmiliidda, de mii diehtit ahte máilmmis ii leat oktage eahpeipmil iige oktage eará Ipmil go dat áidna okta. 5 Jos vel leatge ipmilat almmis ja eatnama alde – ja leat gal ollu ipmilat ja ollu hearrát – 6 de mis lea dušše okta Ipmil, Áhčči. Sus boahtá buot, ja mii leat su várás. Mis lea dušše okta Hearrá, Jesus Kristus. Son lea sivdnidan buot, ja mii eallit su bokte.
7 Muhto ii buohkain leat dát diehtu. Go muhtumat dán rádjái leat hárjánan bálvalit eahpeipmiliid, de sii borret bierggu namalassii oaffarbiergun, ja sin rašis oamedovdu duolvá. 8 Muhto ii borramuš doalvvo min lagabui Ipmila. Mii eat šatta buorebun jos borrat, eatge heajubun jos eat bora. 9 Muhto váruhehket vai din friddjavuohta ii šatta jorralussan rašis olbmuide! 10 Jos du rašis viellja oaidná du geas lea dát diehtu, boradeamen eahpeipmila tempelis, de almma dalle su oamedovdu oažžu das doarjaga ja roahkasmahttá sunai borrat oaffarbierggu? 11 Ná du diehtu doalvu hevvui rašis olbmo, du iežat vielja gean ovddas Kristus lea jápmán. 12 Go dii dán láhkái suddudehpet vieljaideattet vuostá ja hávváduhttibehtet sin rašis oamedovddu, de dii suddudehpet Kristusa vuostá. 13 Dan dihte: Jos borramuš vearránahttá mu vielja, de mun in šat goassege bora bierggu, aman vearránahttit iežan vielja.