Heelsegh
1 Pöövle gie Jupmelen syjhtehtassen mietie gohtjesovveme Kristus Jeesusen apostelinie, jïh mijjen vïelle Sostenes, 2 heelsien Jupmelen åålmegasse Korintesne jïh dijjese gïeh aejliestovveme Kristus Jeesusen gielhtie jïh gohtjesovveme aejlies årrodh, jïh heelsien dejtie gïeh fïerhtene lehkesne Jeesus Kristusen nommese tjåarvoeh – gie dijjen jïh mijjen Åejvie lea: 3 Aarmoe jïh raeffie Jupmielistie, mijjen Aehtjeste jïh Åejvie Jeesus Kristusistie!
Jupmelem gijhtebe
4 Iktesth mov Jupmelem gæjhtam juktie dijjese altese aarmoem Kristus Jeesusinie vadteme. 5 Jeesusen gielhtie lidie raerieburrie sjïdteme dovne vijsiesvoeteste jïh daajroste. 6 Saernie Kristusen bïjre nynnehke sjïdteme dijjen luvnie. 7 Dellie ij dijjen naan aarmoevadtese faeties mearan dijjieh Jeesus Kristusem vuertieminie. 8 Daelie jïh minngemes beajjan dijjem stinkede aaj guktie ij gie maehtieh dijjem laejhtedh gosse mijjen Åejvien, Jeesus Kristusen, biejjie båata. 9 Jupmele stynkehke jïh dijjem tjåårveme jïjtse baernine aktanidh, Jeesus Kristusinie, mijjen Åejvine.
Ræjhtoe åålmegisnie
10 Åerpenh, dellie mijjen Åejvien, Jeesus Kristusen nommesne bïhkedem latjkes årrodh. Aellede baajh jaahkoeh jïh åssjalommesh dijjem juekedh. 11 Åerpenh, govleme Klojen fuelhkeste, dijjen luvnie ræjhtoe 12 man bïjre edtjem soptsestidh. Såemies jiehtieh: «Sïjhtem Pöövline årrodh» jïh såemies jiehtieh: «Apollosinie» jallh «Kefasine» jallh «Kristusinie». 13 Mejtie jïjnjh kristush sjïdteme? Mejtie Pöövle kroessese dijjen åvteste kroessese noeresovvi? Vuj Pöövlen nommese lååvkesovveme lidie? 14 Jupmelem gæjhtam juktie manne ajve Krisposem jïh Gaiusem dijjen luvnie lååvkeme. 15 Dellie ij gie maehtieh jiehtedh mov nommese lååvkesovveme. 16 Stefanosem jïh altese fuelhkiem leam aaj lååvkeme jïh dellie amma idtjim gïem jeatjebem laavkoeh. 17 Kristuse idtji mannem stillh laavkodh. Mannem stilli bueriesaerniem saarnodh, ij håalohkelaakan jïh vijsieslaakan guktie Kristusen kroesse faamohth sjædta.
Veartenen vijsiesvoete jïh kroessen jiermehtsvoete
18 Saernie kroessen bïjre jiermehtsvoete dejtie gïeh smualkah. Mijjese gïeh gorredovvebe, dïhte Jupmelen faamoe. 19 Tjaalasovveme lea:
Vijsies almetji vijsiesvoetem jamhkelemjïh jïermegs almetji jiermieh earjohtem.20 Gusnie jïermegs almetjh, tjaaleh-åahpetjh jïh veartenen håalijes almetjh? Ij leah Jupmele veartenen vijsiesvoetem jiermehtsvoetine dorjeme? 21 Juktie veartene mij Jupmelen vijsiesvoetesne, idtji vijsiesvoeten viehkine Jupmielinie åahpenh. Dellie Jupmele ussjedi dejtie gïeh jaehkieh, gorredidh jiermehtsvoetine maam håalobe. 22 Juvdeladtjh gihtjieh væhtaj mietie, grekeladtjh vijsiesvoeten mietie. 23 Mijjieh hov håalobe Kristuse kroessese noeresovvi. Dïhte dåeriesmoerine juvdeladtjide jïh jiermehtsvoetine jeatjah-jaahkoeladtjide. 24 Mohte dejtie gïeh gohtjesovveme, dovne juvdeladtjide jïh grekeladtjide, Kristuse Jupmelen vieksiesvoetine jïh Jupmelen vijsiesvoetine lea. 25 Jupmelen jiermehtsvoete sagke væjsahkåbpoe almetjen vijsiesvoeteste; jïh Jupmelen viesjiesvoete sagke veaksahkåbpoe almetjen veaksehksvoeteste.
26 Åerpenh, dijjieh gïeh gohtjesovveme, vuartasjidie jïjtjesadth: eah jïjnjesh dijjeste væjsehke almetji tjelmiej uvte, eah jïjnjesh faamojne leah jallh rïektes slïekteste. 27 Dïhte mij veartenen tjelmien uvte jiermehth, dam Jupmele veeljie guktie vijsies almetjh edtjieh skaamasjidh. Jïh dïhte mij veartanisnie væjsehke, dam Jupmele veeljie guktie faamoeladtjh edtjieh skaamasjidh. 28 Jïh dam almetjem maam veartene væssjohte jïh ålkoste jïh dam mij onne lea, dam Jupmele veelji sïjhti smööledh dam mij stoere. 29 Numhtie ij gie maehtieh Jupmelen uvte garmerdidh. 30 Jupmele dijjem Kristus Jeesusisnie aktanamme gie mijjen vijsiesvoete Jupmelen luvhtie lea, mijjen rïektesvoete, mijjen aejliesvoete jïh mijjen gorredimmie. 31 Tjaalasovveme lea: Dïhte gie garmerde, galka Jupmelem garmerdidh.