Searvegoddi ja dan geahččit
1 Dán ávžžuhusa mun cealkkán daidda geat din gaskkas leat vuorrasat – mun gii iešnai lean vuoras ja Kristusa gillámušaid duođašteaddji ja maiddái oasálaš dan hearvásvuhtii mii almmustuvvá: 2 Gehččet ja áimmahuššet ealu maid Ipmil lea didjiide oskkildan, allet bákkus muhto eaktodáhtos, Ipmila dáhtu mielde, allet vuoittu dihte muhto váimmodet hálus. 3 Allet hearrán ráđđe daid geat leat din oassin oskkilduvvon, muhto lehket ellui ovdagovvan. 4 Go váldogeahčči almmustuvvá, de dalle dii oažžubehtet hearvásvuođa vuoitogierddu mii ii goassege golnna.
5 Dii nuorat, lehket vuorrasiidda vuolibuččat. Ja dii buohkat: Gárvodehket gaskavuođa vuollegašvuođa, dasgo Ipmil vuosttalda čeavlás olbmuid, muhto vuollegaččaid son árpmiha. 6 Vuollánehket nappo Ipmila fámolaš gieđa vuollái, de son alida din go áigi dievvá. 7 Bidjet buot morrašiiddádet su noađđin, danin go son atná dis fuola.
8 Lehket čilgosat ja gohcet! Din vuostálasti beargalat manná birra dego čeargu ledjon ja ohcá, gean beasašii njiellat. 9 Vuosttaldehket su, nanusin oskkus! Diihan diehtibehtet ahte din vieljat deaivvahallet seammá gillámušaide dán máilmmis. 10 Buot árpmu Ipmil lea Kristusis rávkan din agálaš hearvásvuohtasis. Go lehpet oanehaš gillán, de son ráhkkanahttá, gievruda ja doarju din ja dahká din nanusin. 11 Su lea fápmu agálašvuhtii. Amen.
Loahppadearvvahus
12 Silvanusa mielde gean anán luohtehahtti vielljan, mun sádden dán oanehis girjji mas arvvosmahtán din ja duođaštan ahte dat árbmu mas eallibehtet, duođaid lea Ipmila árbmu. Bissot das nanusin!
13 Didjiide cealká dearvvuođaid Babylona searvegoddi mii lea válljejuvvon nugo diige, ja iežan bárdni Markus. 14 Dearvvahehket guhtet guimmiideattet ráhkisvuođa cummáin.
Ráfi didjiide buohkaide geat lehpet Kristusis.