1 Muhto áiggiin ja bottuin mun in dárbbaš čállit didjiide, vieljažiiddán, 2 danne go dii diehtibehtet bures ahte Hearrá beaivi boahtá dego suola ihkku. 3 Aiddo go olbmot dadjet: “Ráfi ja oadjebasvuohta”, de heavahus deaivida sin fáhkkestaga dego ávttat áhpehis nissona, eaige sii eisege beasa báhtarussii. 4 Muhto dii, vieljažiiddán, ehpet vádjol seavdnjadasas, iige dat beaivi sáhte boahtit din badjelii fuomáškeahttá dego suola. 5 Dii buohkat lehpet čuovgasa ja beaivvi mánát. Mii eat leat ija eatge seavdnjadasa mánát. 6 Mii eat dasto oaččo oađđit nugo earrásat, muhto fertet gohcit ja bissut čielggusin. 7 Dat geat ođđet, ođđet ihkku; dat geat juhket, leat gárremiin ihkku. 8 Muhto mii geat gullat beaivái, fertet bissut čielggusin: Mii fertet gárvodit oskku ja ráhkisvuođa ruovdegárvvu ja váldit oaivesuodjin bestojumi doaivvu. 9 Ipmil ii leat mearridan min šaddat moari vuollái, muhto vuoitit bestojumi Hearrámet Jesus Kristusa bokte. 10 Son jámii min ovddas vai mii, leažžat dal gohcimin dahje oađđimin, ealášeimmet ovttas suinna. 11 Dan dihte arvvosmahttet ja nanosmahttet guhtet guimmiideattet, nugo dii maiddái dahkabehtet.
Ávžžuhusat ja dearvvuođat
12 Mii bivdit din, vieljažiiddán, atnit árvvus daid geat din gaskkas rahčet, barget searvegotti njunušin ja rávvejit din. 13 Gudnejahttet sin ja atnet sin erenoamáš ráhkisin sin barggu dihte. Ellet ráfis guhtet guimmiideattetguin. 14 Mii ávžut din, vieljažiiddán: Cuiggodehket jeagohemiid, jeđđejehket hearddohuvvan olbmuid, atnet fuola heajuin ja lehket gierdavaččat buohkaiguin. 15 Váruhehket mávssaheames bahá baháin, muhto barget álelassii dahkat buriid guhtet guimmiidasadet ja buot olbmuide.
16 Lehket álelassii ilus. 17 Rohkadallet heaittekeahttá. 18 Giitet Ipmila juohke dilis. Dan Ipmil vuordá dis geat gullabehtet Kristus Jesusii. 19 Allet čáskat Vuoiŋŋa, 20 allet fuono profehtastallanattáldaga. 21 Geahččalehket buot ja dollet dan mii lea buorre. 22 Fasttášehket juohkelágán bahávuođa.
23 Vare ráfi Ipmil basuhivččii din ollásit ja várjalivččii din vuoiŋŋa, sielu ja rupmaša, nu ahte lehpet ollásat ja láitemeahttumat go min Hearrá Jesus Kristus boahtá. 24 Son guhte rávká din, lea oskkáldas ja doallá iežas lohpádusa.
25 Vieljažiiddán, rohkadallet min ovddas! 26 Dearvvahehket buot vieljaid bassi cummáin. 27 Hearrá nammii mun gohčun din lohkat dán girjji buot vieljaide.
28 Hearrámet Jesus Kristusa árbmu lehkos dinguin!