Paulusa vuosttaš girji Timoteusii

Ávžžuhus eallit kristtalaš eallima

¹ Mun neavvun din ovddimustá átnut, rohkadallat, doallat ovddasrohkadusaid ja giitit buot olbmuid ovddas, ² gonagasaid ja buot daid ovddas geain lea váldi, vai mii oažžut eallit jaskes ja ráfálaš eallima, juohke dáfus vuoiggalaččat ja gutnálaččat. ³ Dákkár rohkadus lea vuoigat ja dohkálaš Ipmilii, min beastái, ⁴ guhte dáhttu ahte buot olbmot bestojuvvojit ja bohtet dovdat duohtavuođa. ⁵ Ipmil lea okta, ja okta lea gaskaolmmái Ipmila ja olbmuid gaskkas, olmmoš Kristus Jesus. ⁶ Son attii iežas lonisin buohkaid ovddas, duođaštussan Ipmila áigumušas, go áigi lei dievvan. ⁷ Dán sága sárdnideaddjin ja apostalin mun lean biddjojuvvon. Mun sártnun duođa, mun in gielis. Mun lean biddjojuvvon báhkiniid oahpaheaddjin, oahpahit sidjiide oskku ja duohtavuođa.

⁸ Mun dáhtun ahte go olbmát rohkadallet, de sii juohke sajis bajidit gieđaid rohkadussii buhtis mielain, almmá vaši ja eahpádusa haga. ⁹ Seammá láhkái mun dáhtun ahte nissoniid čikŋan lea gutnálaš, viivvolaš ja vuollegis eallin, eai bárggaldagat, gollečiŋat, bearralat eaige divrras biktasat, ¹⁰ muhto buorit dagut, nugo heive nissoniidda geat dovddastit bálvalit Ipmila.

¹¹ Nisson galgá guldalit oahpahusa, jaskadit ja vuollegažžan. ¹² Mun in suova ahte nisson oahpaha inge dan ahte son mearrida olbmá; son galgá eallit jaskatvuođas. ¹³ Adamhan sivdniduvvui vuohččan ja dasto Eva, ¹⁴ iige Adam beahtahallan, muhto nisson beahtahalai ja rihkui báhkkoma. ¹⁵ Muhto mánáid riegádahttin son bestojuvvo, jos eallá oskkus, ráhkisvuođas ja bassivuođas.