Paulusa vuosttaš girji Timoteusii

Searvegotti jođiheddjiid iešvuođat

¹ Dát sátni lea luohtehahtti: Gii viggá searvegotti geahčči doibmii, dat dáhttu deaŧalaš bargui. ² Searvegotti geahčči galgá leat láitemeahttun, ovtta nissona boadnjá, juguheapme, mášolaš, gutnálaš, árvvas ja čeahppi oahpahit, ³ ii jugeš, ii riidui iige ruhtaváibmil, muhto láđis ja soabalaš. ⁴ Son galgá atnit buori fuola iežas bearrašis, šaddadit mánáidis gulolašvuhtii ja vádjolit gutnálaččat. ⁵ Jos muhtun ii máhte atnit fuola iežas bearrašis, de mo son dalle máhtášii atnit fuola Ipmila searvegottis? ⁶ Son ii oaččo leat jorgalan easkabáliid, amas čeavlut ja šaddat dubmejuvvot oktan beargalagain. ⁷ Sus galgá leat buorre beaggin maiddái olggobealolbmuid gaskkas, amas šaddat bilkun ja sorrot beargalaga gillii.

Searvegottibálvváid iešvuođat

⁸ Maiddái searvegottibálvvát galget leat gutnálaččat ja rehálaččat. Sii eai oaččo leat jugešat eaige bivdit iežaset ávkki. ⁹ Sii galget dovdat oskku čiegusvuođa ja atnit oamedovdduset buhtisin. ¹⁰ Muhto maiddái sin galgá vuos geahččalit, ja go sii leat gávnnahuvvon láitemeahttumin, de sii ožžot bálvališgoahtit. ¹¹ Seamma láhkái nissonat galget leat gutnálaččat, sii eai oaččo sárdnut sealggebealde. Sii galget leat juguheamit ja oskkáldasat juohke dáfus. ¹² Searvegottibálvá galgá leat ovtta nissona boadnjá, ja son galgá atnit buori fuola mánáinis ja bearrašisttis. ¹³ Dat geat bálvalit bures, adnojuvvojit árvvus, ja sii sáhttet gulahit roahkkadit oskku Kristus Jesusii.

Oskku čiegusvuohta

¹⁴ Dáid rávvagiid mun čálán dutnje, vaikko sávange fargga beassat boahtit du lusa. ¹⁵ Jos mun ádjánan boahtimis, don dál dieđát mo olmmoš galgá vádjolit Ipmila tempelis, ealli Ipmila searvegottis, mii lea duohtavuođa bázzi ja vuođđudus.

¹⁶ Mii dovddastit ahte min oskku bassi čiegusvuohta lea stuoris:

Son almmustuvai olmmožin,

son gulahuvvui vanhurskkisin Vuoiŋŋas,

eŋgelat ožžo su oaidnit,

son sárdniduvvui álbmogiidda,

máilmmis olbmot osko sutnje,

son bajiduvvui hearvásvuhtii.