Jaahkoe jïh dahkoe
3 Jeesusen jupmeles faamoe gaajhkem mijjese vadteme maam jupmeles jieliemasse daarpesjibie juktie altemse damtebe gie mijjem gåhtjoeji altese hearlohkevoetine jïh faamojne. 4 Dellie stööremes jïh dovresommes dåajvojde libie åådtjeme. Dejgujmie edtjede jupmeles mïelem åadtjodh gosse lidie smualkoej luvhtie gorredovveme mah veartenen tjohtjemistie båetieh.
5 Dannasinie galkede eadtjohkelaakan voejhkelidh jaahkoem rïektes jielieminie ektiedidh jïh rïektes jielemem daajrojne ektiedidh, 6 daajroem vïssjelesvoetine, vïssjelesvoetem saavrehkevoetine, saavrehkevoetem jupmele-våavkasjimmine, 7 jupmele-våavkasjimmiem åerpene-gieriesvoetine jïh åerpene-gieriesvoetem gieriesvoetine gaajhkesidie. 8 Jis dam buektiehtidie, jïh eensilaakan buektiehtidie, dellie eah dijjen daajroeh mijjen Åejvie Jeesus Kristusen bïjre dahkoej namhtah jïh baalhkaj namhtah sjïdth. 9 Dïhte gie ij leah dam buektiehtamme, mahte vuajna, tjelmiehtadtje lea jïh åajaldahteme satne reejnesovveme dej beeli sådtojste.
10 Dellie åerpenh, tjoerede eadtjohkelaakan voejhkelidh dijjen gohtjesovvemem jïh veeljesovvemem nænnoestidh. Jis voejhkelidie, dellie idie galkh gåessie gænnah gahtjedh. 11 Dellie åadtjode mijjen Åejvien jïh lutniestæjjan Jeesus Kristusen ihkuve rïjhkese aelhkieslaakan gaahpoe-oksen tjïrrh tjaangedh.
Idtjimh vaajesh saarnoeh
16 Idtjimh vaajesh saarnoeh mejtie almetjh jïermestalleme gosse mijjen åejvien Jeesus Kristusen faamoen jïh båetemen bïjre saarnoejimh. Mijjieh hov jïjtjh Jeesusen gunkies faamoem vööjnimh. 17 Jeesuse earoem jïh hearlohkevoetem Jupmielistie, mijjen Aehtjeste, dåastoeji dan aejkien gosse gïelem jallatjommesen hearlohkevoeteste govli: «Daate mov gieries Baernie gie mov mïelesne.» 18 Mijjieh aaj dam govlimh gosse Jeesusinie aktesne limh bijjene aejlies vaeresne.
19 Dellie amma maehtebe profeete-baakojde leajhtadidh. Baajede dejtie dijjese tjoevkedh goh tjoevkese jemhkelds gåetesne tjuavka goske aereds-gååkse jïh aereds-aabroedæjja dijjen vaajmoej sïjse jijhtieh. 20 Eeremes tjoerede daejredh idie maehtieh profeete-baakoem jïjtjh guarkedh. 21 Juktie ij naan profeete-baakoe båateme almetjen syjhtehtassen mietie. Aejlies Voejkene almetjidie eevtjeme baakoeh Jupmelen luvhtie saarnodh.