David ja Mefibošet
1 David jearai: “Leažžágo Saula sogas báhcán oktage, geasa mun sáhtášin leat árbmugas Jonatana dihte?” 2 Saula viesus lei leamaš bálvaleaddji gean namma lei Siba. Son rávkojuvvui Davida lusa, ja gonagas jearai: “Leatgo don Siba?” Ja son vástidii: “Mun lean, hearrá.” 3 Gonagas jearai: “Iigo Saula sogas leat šat báhcán oktage, geasa mun sáhtášin leat árbmugas, dego Ipmil lea árbmugas?” Siba vástidii gonagassii: “De lea okta, Jonatana skierbmábárdni.” 4 Gonagas jearai: “Gos son lea?” Siba dajai: “Son lea Makira, Ammiela bártni, viesus Lo Debaris.” 5 Gonagas vieččahii su, 6 ja nu Mefibošet, Jonatana bárdni ja Saula áddjut, bođii Davida lusa ja gopmirdii eatnamii muođuid. 7 David dajai sutnje: “Ale bala. Mun áiggun leat dutnje árbmugas áhčát Jonatana dihte. Mun attán dutnje ruoktot buot eatnamiid mat gulle áddjásat Saulii, ja don oaččut borrat álo mu beavddis.” 8 Dalle Mefibošet gopmirdii fas ja dajai: “Mii lean mun, go don jorgalat dákkár jápma beatnaga beallái?”
9 Gonagas rávkkai Siba, Saula bálvaleaddji, ja dajai sutnje: “Buot mii lea gullan Saulii ja su sohkii, mun attán du hearrá bárdnái. 10 Bargga su ovddas eatnama bártniidatguin ja bálvaleddjiidatguin ja rája šattu, vai du hearrá bártnis lea birgemuš. Mefibošet, du hearrá bárdni, oažžu borrat álo mu beavddis.” Sibas ledje vihttanuppelohkái bártni ja guoktelogi bálvaleaddji. 11 Siba dajai gonagassii: “Mun dagan aiddo nugo mu hearrá ja gonagas gohčču.” Dan rájes Mefibošet borai gonagasa beavddis ovttas gonagasa bártniiguin.
12 Mefibošetis lei unna bártnáš gean namma lei Mika. Oppa Siba veahka bálvalii ain Mefibošeta, 13 muhto Mefibošet ieš ásai Jerusalemis, danin go son borai álo gonagasa beavddis. Son skierpmui goappáge juolggistis.