Morašlávlla Israelii
1 Gula dán sáni, Israela álbmot, morašlávlaga maid mun lávllun du hárrái:
2 Nieida Israel lea gahččan,
ii son čuožžil šat eambbo.
Son veallá hilggohassan iežas eatnamis,
ii oktage čuoččáldahte su.
3 Ná cealká Hearrá Ipmil Israela álbmogii:
Jos gávpogis vulget soahtái duhát olbmá,
de čuođis báhcet,
ja jos čuođis vulget,
de logis báhcet.
4 Ná cealká Hearrá Israela álbmogii:
Ohcet mu, de dii oažžubehtet eallit!
5 Allet vuolgge Betelii,
allet mana Gilgalii,
allet vádjol Beer Šebai!
Gilgalhan dolvojuvvo fáŋgavuhtii,
ja duššin šaddá Betel.
6 Ohcet Hearrá, de oažžubehtet eallit!
Muđui son falleha dollan
Josefa eatnama ja duššada dan,
ja Betel buollá, iige leat čáskadeaddji.
7 Dii dahkabehtet rievtti máronin
ja suhppebehtet vuoigatvuođa eatnamii.
8 Son lea dahkan
Nieidagihpu ja Čuoiggaheddjiid.
Son nuppástuhttá seavdnjada iđidin
ja sevnnjodahttá beaivvi idjan.
Son rávká ábi čázi
ja golggaha dan eatnamii.
Hearrá lea su namma.
9 Son diktá heavahusa
álddagastit ladni badjelii,
ja nana ladnige cuovkana.
10 Dii vašuhehpet dan gii
doarju rievtti dikkis,
ja fasttášehpet dan gii sárdnu duođa.
11 Dii duolbmabehtet váivvášiid
ja gáibidehpet sis gortni divadin.
Dan dihte didjiide geavvá ná:
Vaikko dii huksebehtet
viesuid čullojuvvon geađggis,
de dii ehpet oaččo ássat dain.
Vaikko dii gilvibehtet
hearvás viidnegárddiid,
de dii ehpet oaččo juhkat daid viinni.
12 Mun dovddan din ollu rihkkumiid
ja din eatnat suttuid.
Dii doarrádallabehtet vigihis olbmuid,
váldibehtet duolgguid
ja ádjibehtet gefiid dikkis.
13 Dan dihte jierpmálaš
orru jávohaga dán áiggi,
dainna go dat lea bahás áigi.
14 Ohcet buori alletge bahá,
de dii oažžubehtet eallit!
Dalle Hearrá, Almmiveagaid Ipmil,
lea dinguin, nugo dii dadjabehtet.
15 Vašuhehket bahá ja ráhkistehket buori,
diktet rievtti ráđđet gávpotpoarttas!
Dalle Hearrá, Almmiveagaid Ipmil,
lea árbmugas Josefa bázahassii.
16 Danne cealká Hearrá,
Almmiveagaid Ipmil, Hearrá:
Buot šiljuin gullojit váidalusat,
buot geainnuin olbmot čurvot:
“Vuoi, vuoi!”
Sii bovdejit morašdoaluide bealdobargiid,
rávket váidalusaide dakkáriid
geat máhttet lávlut morašlávlaga.
17 Buot viidnegárddiin
gullo vuobaideapmi,
go mun manan ovdan din gaskkas,
cealká Hearrá.
18 Vuoi din geat áibbašehpet
Hearrá beaivvi!
Manin ávkin Hearrá beaivi lea didjiide?
Dat buktá seavdnjadasa, ii čuovgga –
19 dego dalle go olmmái
báhtara ledjonis,
muhto su ovddal boahtá guovža,
ja go son boahtá ruoktot ja dorje seaidnái,
de son gáskkáhallá gearbmašii.
20 Almma Hearrá beaivi lea seavdnjat
iige čuovgat,
moskuvuohta mas ii leat ii suotnjarašge?
21 Mun vašuhan din ávvudemiid,
mun fasttášan daid,
din ávvučoakkalmasaid mun in gierdda.
22 Go dii oaffaruššabehtet munnje
boaldinoaffariid ja borramušoaffariid,
de mun in váldde daid vuostá,
din buoiddes gálbbebiergooaffariidda
mun in geahča.
23 Gáidat mus lávlagiiddát šláma!
Mun in dáhto gullat du hárppaid čuojaheami.
24 Muhto golggiidehkos vuoigatvuohta
dego čáhci,
vanhurskkisvuohta dego
álelassii golgi jogaš.
25 Buvttiidetgo dii munnje
njuovvanoaffariid ja borramušoaffariid
meahcis dan njealljelogi jagi,
Israela álbmot?
26 Ehpet, muhto dii guttiidet
ipmilgovaideattet,
Sakkuta, din gonagasa,
ja Kevana, din ipmilnástti,
maid leiddet dahkan alcceseattet.
27 Mun doalvvun din fáŋgavuhtii
dobbelii Damaskusa, cealká Hearrá.
Almmiveagaid Ipmil lea su namma.