Golbma oainnáhusa
1 Hearrá Ipmil oainnihii munnje dán oainnáhusa: Son sivdnidii rásselohkkomoađi aiddo go rahttá bohciidišgođii gonagasa rásseláddjema maŋŋil. 2 Go rásselohkut ledje geargan borramis buot eatnama rásiid, de mun dadjen: “Atte juo ándagassii, Hearrá Ipmil! Mo sáhttá Jakob ceavzit, sonhan lea nu uhcci?” 3 Dalle Hearrá gáđai ja celkkii: “Dát ii dáhpáhuva.”
4 Hearrá Ipmil oainnihii munnje dán oainnáhusa: Son rávkkai dollaarvvi, ja go dat lei loahpahan stuorra čiekŋalasa ja lei borramin bealdoeatnama, 5 de mun dadjen: “Heaitte juo eret, Hearrá Ipmil! Mo sáhttá Jakob ceavzit, sonhan lea nu uhcci?” 6 Dalle Hearrá gáđai ja celkkii: “Ii dátge dáhpáhuva.”
7 Hearrá Ipmil oainnihii munnje dán oainnáhusa: Son lei čuožžumin muvrra alde ladjoloadda gieđas. 8 Son celkkii munnje: “Amos, maid don oainnát?” Mun vástidin: “Ladjoloatta.” Dalle Hearrá celkkii: “Mun geahččalan ladjoloattain álbmogan Israela. Mun in dáhto šat árkkálmastit dan.
9 Isaka oaffardievát duššaduvvojit,
Israela bassibáikkit báhcet ávdimin,
ja Jeroboama soga vuostá
mun lokten miehki.”
Amos ja báhppa Amasja
10 Betela báhppa Amasja vuolggahii Jeroboamii, Israela gonagassii, sáni: “Amos lea ráhkadeamen lihtu du vuostá israellaččaid gaskkas. Eanan ii gierdda su ságaid. 11 Amos lea cealkán:
Jeroboam jápmá miehkkái,
ja Israel dolvojuvvo eret eatnamisttis.”
12 Amasja dajai Amosii: “Oaidni, mana geidnosat, vuolgge Judai! Bora doppe láibbát, profehtastala doppe. 13 Muhto Betelis don it oaččo šat profehtastallat, danne go dát lea gonagasa bassibáiki ja riikka tempel.” 14 Amos dajai Amasjai: “Mun in leat profehta inge profehta máhttájeaddji muhto oapmegeahčči, ja mun šaddadan meahccefiikoniid. 15 Muhto Hearrá válddii mu sávzaealu luhtte ja celkkii munnje: Mana profehtastallat mu álbmoga Israela vuostá. 16 Ja dál, gula Hearrá sáni! Don dajat: ‘Ale profehtastala Israela vuostá, ale sárdnit Isaka soga vuostá!’ 17 Dan dihte Hearrá cealká:
Du áhkká šaddá fuorrán dán gávpogii,
du bártnit ja nieiddat gahččet miehkkái,
ja du eanan juogaduvvo mihttobáttiin.
Don ieš jámát buhtismeahttun eatnamii,
ja Israel dolvojuvvo eret iežat eatnamis.”