Viđát oainnáhus
1 Mun oidnen Hearrá
čuožžumin áltára guoras.
Son celkkii: Časkke bázzeoivviid
nu ahte uksalasát doarggistit,
cuvke daid buohkaid oaivái!
Daid geat báhcet, mun gottán mihkiin.
Ii oktage sis beasa báhtarit,
ii oktage beasa heakkas báhtarussii.
2 Jos sii bahkkejit jábmiidáibmui,
de mun vieččan sin doppe,
ja jos sii badjánit albmái,
de mun norddastan sin doppe vuolás.
3 Jos sii mannet čihkosii Karmela alážii,
de mun ozan sin ja dohppen sin,
ja jos sii čiehkádit mu ovddas ábi bodnái,
de mun gohčun guovddi gáskkestit sin.
4 Jos sin vašálaččat dolvot sin fáŋgavuhtii,
de mun gohčun miehki goddit sin.
Mun geahčastan sidjiide
oasehisvuohtan inge lihkkun.
5 Son lea Hearrá, Almmiveagaid Ipmil.
Son guoskkaha eatnama, ja dat doarggista.
Buohkat geat ásset das, moraštit.
Oppa eanan badjána nugo Nileatnu,
dat coahku nugo Egypta eatnu.
6 Son lea huksen albmái iežas alla sála,
lebben gomuvuođas eatnama badjel.
Son rávká čáziid ábis
ja golggaha daid miehtá eatnama.
Hearrá lea su namma.
Hearrá lea buot álbmogiid Ipmil
7 Ehpetgo dii, israellaččat,
leat munnje dego nubialaččat?
cealká Hearrá.
Mun bukten Israela Egyptas,
muhto maiddái filistalaččaid Kaftoris
ja aramealaččaid Kiris.
8 Hearrá Ipmila čalmmit leat
dán suttolaš riikka vuostá.
Mun sihkun dan eatnama alde.
Dattetge mun in áibbas loahpat Jakoba náli,
cealká Hearrá.
9 Geahča, mun gohčun buot álbmogiid
savdnjit Israela dego olmmoš savdnjá
gortniid seavllis,
iige oktage gordnečalbmi gahča eatnamii.
10 Mu álbmoga suttolaččat jápmet miehkkái,
buohkat geat dadjet:
“Lihkuhisvuohta ii jovssa min.”
Israel čuoččáldahttojuvvo ođđasis
11 Dan beaivvi mun ceggen fas
Davida gahččan goađi.
Mun muvren gitta dan ráhkamiid,
ceggen dan mii lea njeidojuvvon
ja huksen dan dakkárin go dat lei dolin.
12 Ja nu Israel váldá opmodahkanis
Edoma bázahasa ja buot daid álbmogiid
mat gohččojuvvojit mu namain,
cealká Hearrá, guhte dahká dán.
13 Geahča, beaivvit bohtet, cealká Hearrá,
goas dat gii jorgu eatnama,
joksá láddjejeaddji
ja dat gii duolbmá viidnemurjjiid,
joksá dan gii gilvá,
goas viidnemuorjesáhppi goaiku váriin
ja golgá buot dieváin.
14 Dalle mun jorgalan
mu álbmoga Israela vuorbbi.
Sii huksejit ođđasis duššaduvvon gávpogiid
ja ásset daidda,
sii gilvet viidnegárddiid
ja juhket ieža daid viinni,
sii gilvet gilvvagárddiid
ja borret ieža daid šaddosiid.
15 Mun gilvván sin fas sin iežaset eatnamii,
eaige sii šat rohttejuvvo dan eatnamis
maid mun lean addán sidjiide,
cealká Hearrá, du Ipmil.