1 Jos profehta dahje niegadeaddji čuožžila din gaskkas ja lohpida dahkat mearkka dahje oavddu, 2 ja oččoda din bálvalit vieris ja dovdameahttun ipmiliid maid dii ehpet dovdda, ja vaikko dat mearka dahje oavdu šattašiige duohtan, 3 de allet guldal dakkár profehta dahje niegadeaddji. Hearrá, din Ipmil, geahččala din vai oaidná ráhkistehpetgo dii duođaid su oppa váimmus ja oppa sielus. 4 Čuvvot dušše Hearrá, Ipmileattet, ballet sus ja dollet su báhkkomiid, jeagadehket ja bálvalehket su ja lehket sutnje oskkáldasat. 5 Muhto dat profehta dahje niegadeaddji galgá goddojuvvot, danne go son ávžžuhii stuibmidit Hearrá, din Ipmila vuostá, gii buvttii din Egyptas ja besttii din šlávvaviesus. Son fillii din jorgalit dan geainnus maid Hearrá, din Ipmil, lea gohččon din vádjolit. Duššadehket álbmoga gaskkas dan mii lea bahá.
6 Vaikko du iežat viellja, eatnát bárdni, du iežat bárdni dahje nieida dahje áhkká gean ráhkistat, dahje du lagamus ustit suollemasat giktala du bálvalit vieris ipmiliid maid it don eaige du áhčit leat oahppan dovdat, 7 daid birasálbmogiid ipmiliid mat ásset din birra eatnama ravddas nubbái lahka dahje guhkkin, 8 de ale mieđit sutnje alege gula su. Ale árkkálmastte alege árpmit su, ale čiega su rihkkosa, 9 muhto gotte su. Du giehta galgá leat vuosttamužžan goddimin su, ja de buot earát galget dahkat seammá láhkái. 10 Geađgádehket su jámas, danin go son vikkai čuoldit din Hearrás, Ipmilisttádet, gii buvttii din Egyptas, šlávvaviesus. 11 Buot israellaččat galget gullat dan, vai sii balašedje eaige šat dagaše dakkár bahás dagu.
12 Jos dii gullabehtet soapmása muitaleamen ahte muhtun gávpogis gosa Hearrá, din Ipmil, addá din ássat, 13 leat du álbmoga bahás olbmát giktalan ássiid bálvalit eará ipmiliid maid dii ehpet dovdda, 14 de dii galgabehtet dárkilit dutkat, guorahallat ja diđoštit dan. Jos dakkár fastivuohta duođaid lea dahkkojuvvon, 15 de galgabehtet goddit dan gávpoga ássiid mihkiin. Dii galgabehtet vihahit duššadeapmái gávpoga ja buot mii das lea, ja goddit velá omiidge. 16 Dii galgabehtet čohkket márkanšilljui buot maid lehpet váldán sálašin ja dasto boaldit gávpoga ja oppa sállaša ollesoaffarin Hearrái, din Ipmilii. Dakkár gávpot galgá báhcit čievračopman agálaččat, dan ii oaččo hukset šat goassege. 17 Ii mihkkege mii lea vihahuvvon duššadeapmái, oaččo báhcit din háldui. Nu Hearrá buolli moarri čáská, son árpmiha din ja dahká din árpmustis stuorra álbmogin, nugo son vuordnumiin lohpidii din áhčiide. 18 Nu dáhpáhuvvá, jos dii jeagadehpet Hearrá, Ipmileattet, báhkkomiid maid mun odne attán didjiide, ja dahkabehtet dan mii lea vuoigat Hearrá, din Ipmila, čalmmiin.