Dorvogávpogat
1 Go Hearrá, din Ipmil, duššada daid álbmogiid maid eatnamiid son addá didjiide, ja dii ádjibehtet sin eret ja ássabehtet sin gávpogiidda ja viesuide, 2 de earuhehket golbma gávpoga dan eatnamis maid Hearrá, din Ipmil, addá didjiide oapmin. 3 Go dii lehpet ožžon čielgasa máđijain, de galgabehtet juohkit golmma oassái dan eatnama maid Hearrá, din Ipmil, addá didjiide opmodahkan. Daidda gávpogiidda sáhttá báhtarit juohkehaš gii lea goddán olbmo.
4 Dát lea eaktun dasa ahte olmmošgoddi beassá eallit go son báhtara dohko: Jos son lea goddán nuppi olbmo vahágis, almmá vašutkeahttá su ovdal – 5 nugo dalle go muhtun manná nuppiin vuovdái čuohppat muoraid, ja ákšu čalgá nađas čuolastettiin ja deaivá nubbái ja goddá su – de son oažžu eallit jos son báhtara dakkár gávpogii. 6 Mátki dohko ii oaččo leat nu guhkki ahte varramávssaheaddji gii moaris doarrida olmmošgoddi, sáhttá joksat su ja časkit su jámas, vaikko son ii ánssáš jápmima, danin go son ii lean vašuhan nuppi ovdal. 7 Dan dihte mun gohčun din válljet alcceseattet golbma dorvogávpoga.
8 Hearrá, din Ipmil, viiddida din eatnama, nugo son vuordnumiin lohpidii din áhčiide, ja addá didjiide oppa dan eatnama maid lohpidii sidjiide, 9 jos dii doallabehtet oskkáldasat oppa dán lága maid mun odne attán didjiide, ja ráhkistehpet Hearrá, Ipmileattet, ja álo vádjolehpet su geainnuid. Go din eanan viidána, de dii galgabehtet earuhit dán golmma gávpoga lassin velá golbma eará dorvogávpoga, 10 vai vigihis varra ii golgga dan eatnamis maid Hearrá, din Ipmil, addá didjiide opmodahkan, ja vai dii ehpet šatta sivalažžan vigihis varrii.
11 Muhto jos muhtun vašuha nuppi, vuođgŋá su ja falleha ja časká su jámas ja de báhtara muhtun dorvogávpogii, 12 de su ruovttugávpoga vuorrasat galget vieččahit su doppe ja addit su varramávssaheaddjái. Son galgá jápmit. 13 Allet árkkálmastte su, muhto jávkadehket vigihis vara vealggi Israelis. Dalle didjiide geavvá bures.
Rádjegeađggit
14 Ale sirdde ránnját rádjegeđggiid, maid máttut leat ceggen du árbeoassái dan eatnamii maid Hearrá, du Ipmil, addá dutnje oapmin.
Láhka duođaštusaid birra
15 Okta áidna duođašteaddji ii leat doarvái dubmet geange sivalažžan vearredahkui dahje rihkkosii, mii suttuid dat velá leažžá. Ášši galgá nannet guovtti dahje golmma duođašteaddji sániin.
16 Jos bahádáhtolaš duođašteaddji sivahallá nuppi vearrečuoččuhusaiguin, 17 de galget goappašagat geaid gaskkas riidu lei, loaiddastit Hearrá muođuid ovddas dan áiggi báhpaid ja duopmáriid ovdii. 18 Duopmárat galget dutkat ášši dárkilit, ja jos sii gávnnahit ahte duođašteaddji lea gielis ja lea addán vearreduođaštusa vieljas vuostá, 19 de sutnje galgá dahkat seammá ládje go son áiggui dahkat vielljasis. Duššadehket bahá álbmoga gaskkas. 20 Go earát gullet dan, de sii ballet eaige šat daga dakkár bahá du gaskkas. 21 Allet árkkálmastte: Heagga heakkas, čalbmi čalmmis, bátni bánis, giehta gieđas, juolgi juolggis.