Gonagas Og vuoittáhallá
1 Dasto mii manaimet dan geainnu mii doalvu Bašanii. Dalle Bašana gonagas Og bođii oppa soahteveagainis Edreii soahtat minguin. 2 Muhto Hearrá celkkii munnje: “Ale bala sus. Mun attán du gihtii su, oppa su álbmoga ja su eatnama. Daga sutnje nugo dahket amorlaččaid gonagassii Sihonii gii ásai Hešbonis.” 3 Ja nu Hearrá, min Ipmil, attii maiddái Oga, Bašana gonagasa, ja oppa su álbmoga min gihtii. Mii gottiimet sin eatge diktán ovttage beassat báhtui. 4 Mii válddiimet maiddái buot su gávpogiid. Mii eat guođđán ovttage gávpoga válddekeahttá. Mii válddiimet guhttalogi gávpoga, oppa Argoba guovllu, oppa Oga riikka mii lei Bašanis. 5 Buot gávpogat ledje nannejuvvon alla muvrraiguin, poarttaiguin ja smarttiiguin. Daidda lassin mii válddiimet eatnat smávva gávpogiid maid birra eai lean muvrrat. 6 Mii vihaheimmet daid duššadeapmái nugo leimmet dahkan Sihonii, Hešbona gonagassii. Mii vihaheimmet duššadeapmái buot gávpogiid olbmáid, nissoniid ja mánáid. 7 Buot omiid ja dan maid rievideimmet gávpogiin, mii válddiimet soahtesálašin.
8 Jordana nuorttabeale guovtti amorlaččaid gonagasas mii válddiimet eatnama Arnonjoga rájes gitta Hermonvári rádjái. 9 Sidonlaččat gohčodit Hermona Sirjonin ja amorlaččatgis Senirin. 10 Mii válddiimet buot aláža gávpogiid, oppa Gileada ja oppa Bašana gitta Salka ja Edrei gávpogiid rádjái mat leat Oga riikkas Bašanis. 11 Og, Bašana gonagas, lei áidna gii lei báhcán refalaččain. Su ruovdeseaŋga lea ain ammonlaččaid Rabbas. Go dat mihtiduvvui dábálaš állanmihtuin, de dat lei ovcci állana guhku ja njeallje állana govddu.
Jordana nuorttabeale eanan juogaduvvo
12 Go mii leimmet váldán dan eatnama, de mun adden rubenlaččaide ja gadlaččaide dan guovllu mii lea Aroera lahka Arnonjohkaleagi ravddas, ja beali Gileada várreeatnamis ja dan gávpogiin. 13 Gileada nuppi beali ja oppa Bašana, Oga riikka, oppa Argoba guovllu mun adden Manasse čeardabeallái. Buot dat, oppa Bašan, navdojuvvo refalaččaid eanamin.
14 Jair, Manasse bárdni, válddii oppa Argoba guovllu gitta gešurlaččaid ja maakalaččaid ráji rádjái ja gohčui dan guovllu, Bašana, Jaira siidan iežas nama mielde. Eanan gohčoduvvo danin velá odnege. 15 Makirii mun adden Gileada. 16 Rubenlaččaide ja gadlaččaide mun adden eatnama Gileadis lulás gitta Arnonjohkaleagi rádjái, ja johka šattai rádjin. Jabbokjohkaleahki šattai rádjin ammonlaččaid vuostá. 17 Jordanleagis ieš johka šattai rádjin Gennesaretjávrri rájes gitta Arabameara dahjege Jápmameara rádjái ja gitta Pisga vilttiid vuollái nuortan.
18 Dalle mun gohččon din: “Hearrá, din Ipmil, lea addán didjiide oapmin dán eatnama. Buot dii soahteolbmát galgabehtet buohkat váldit vearjjuideattet ja mannat israellaš vieljaideattet njunnošis. 19 Dušše din áhkát, mánát ja šibihat – mun dieđán ahte dis leat ollu šibihat – ožžot báhcit gávpogiidda maid mun lean addán didjiide, 20 dassážii go Hearrá lea diktán din vieljaid ássat seammá ládje go dinge, ja maiddái sii leat váldán oapmineaset eatnama maid Hearrá, din Ipmil, addá sidjiide Jordana oarjjabealde. Das maŋŋil dii oažžubehtet máhccat, iešguhtege dan opmodahkii maid mun lean addán didjiide.”
21 Dalle mun maiddái gohččon Josua: “Don leat iežat čalmmiiguin oaidnán buot maid Hearrá, din Ipmil, dagai dan guovtti gonagassii. Nu Hearrá dahká buot gonagasaide ja sin riikkaide maid čađa dii mannabehtet. 22 Allet bala sis, dasgo Hearrá, din Ipmil, ieš soahtá din beali.”
Hearrá hilgu Mosesa rohkadusa
23 Daid áiggiid mun rohkadallen Hearrá: 24 “Hearrá, mu Ipmil, don leat álgán čájehit bálvaleaddjásat iežat stuorisvuođa ja iežat gievrras gieđa. Gii ipmiliid almmis dahje eatnama alde sáhttá dahkat dakkár fámolaš daguid maid don dagat? 25 Divtte mu dál mannat Jordana rastá ja oaidnit dan buori eatnama mii lea Jordana don bealde, dan čáppa várreeatnama ja Libanona.” 26 Muhto Hearrá lei moaris munnje din dihte iige gullan mu. Son celkkii: “Das lea galle, ale sártno das šat munnje. 27 Goarkŋo Pisga čohkkii, geahča oarjjás ja davás, lulás ja nuorttas. Geahčat visot dan, danin go don it oaččo mannat Jordaneanu rastá. 28 Atte Josuai rávvagiid ja nanne ja roahkasmahte su, danne go son rasttilda joga dán álbmoga njunnošis. Dan eatnama maid don dál oainnát, son addá dasa opmodahkan.”
29 De mii oruimet dan leagis mii lea Bet-Peora buohta.