Moses buressivdnida Israela čearddaid
1 Dáinna buressivdnádusain Moses, Ipmila olmmái, buressivdnidii israellaččaid ovdal go jámii. 2 Son celkkii:
Hearrá boahtá Sinajis,
Seiras son badjána čuovgat álbmogasas,
báitimis son almmustuvvá Paranváris.
Son boahtá Kadešmeahci guovllus,
son manná Moaba vilttiid guora.
3 Hearrá ráhkista čearddaidis,
buot su bassi olbmot leat su gieđas.
Sii čohkánit su julggiid ovdii
ja váldet vuostá su sániid.
4 Moses attii midjiide lága
opmodahkan Jakoba searvegoddái.
5 Hearrá šattai Ješuruna gonagassan
go álbmoga oaivámuččat čoagganedje,
go buot Israela čearddat ledje čoahkis.
6 Ruben galgá eallit iige jápmit,
muhto su olbmát eai šatta eatnagin.
7 Juda birra son celkkii:
Hearrá, gula Juda čuorvasa,
divtte su boahtit iežas álbmoga lusa
man ovddas son lea soahtan.
Veahket su su vašálaččaid vuostá!
8 Levi birra son celkkii:
Du tummim galgá Levii,
du urim iežat oskkáldas olbmái,
sutnje gean don geahččalit Massas,
gean don hástet Meribačázis.
9 Son celkkii iežas áhči ja eatni birra:
“Mun in leat oaidnán sudno goassege.”
Son ii dovddastan vieljaidis vielljanis
iige dáhtton dovdat mánáidis.
Levi čearda doalai du sáni
ja bealuštii du lihtu.
10 Sii oahpahit Jakobii du báhkkomiid,
Israelii du lága.
Sii diktet suovvasa badjánit du ovdii
ja buktet ollesoaffariid du áltára ala.
11 Hearrá, buressivdnit su fámu,
suova su gieđaid daguid dohkket dutnje!
Cuvke su vuostálastiid alimiid,
vai su vašálaččat eai šat čuožžil.
12 Benjamina birra son celkkii:
Dat gean Hearrá ráhkista, ássá oadjebassan.
Hearrá várjala su álohii,
son ássá Benjamina dieváid gaskkas.
13 Josefa birra son celkkii:
Hearrá buressivdnida su eatnama
buoremusain mii boahtá almmis,
sulnniin ja čáziin mii boahtá
eatnama čiekŋalasas,
14 buoremus šattuiguin
maid beaivváš láddada
mánus mánnui,
15 dološ váriid láhjiiguin,
agálaš alážiid attáldagaiguin,
16 eatnama valljivuođain,
su buressivdnádusain
gii ásai bastilislátnjámiestagis.
Bohtos dat Josefa oaivvi badjelii,
su oaivečohka badjelii
gii lea vieljaidis oaivámuš.
17 Goargat son lea,
vuovssá vuosttašriegádeaddji.
Dego meahcivuovssá čoarvvit
leat su čoarvvit,
daiguin son doarru buot álbmogiid
gitta eatnama ravddaid rádjái.
Dakkárat leat Efraima logiduháhat,
Manasse duháhat.
18 Sebulona birra son celkkii:
Illut, Sebulon, go vuolggát,
leage ilus, Isaskar, iežat gođiin!
19 Sii rávket álbmogiid várrái
gos sii oaffaruššet rivttes oaffariid.
Sii ellet meara valjis
ja ártnain mat leat čihkkojuvvon sáddui.
20 Gada birra son celkkii:
Buressivdniduvvon lehkos son
gii viiddida Gada eatnama!
Gad lea ássansajistis nugo ledjon,
son gaikkoda gieđa ja oaivvi.
21 Son geahčadii alccesis buoremus oasi,
eatnama mii dohkke ráđđejeaddjái.
Go álbmoga oaivámuččat čoahkkanedje,
de son ollašuhtii Hearrá vanhurskkisvuođa
ja su duomuid Israelis.
22 Dana birra son celkkii:
Dan lea nuorra ledjon
mii boahtá ruohta Bašanis.
23 Naftali birra son celkkii:
Naftali lea valjit árpmihuvvon,
Hearrá lea buressivdnidan su valljugasat,
son oažžu eatnama oarjin ja lullin.
24 Ašera birra son celkkii:
Buressivdniduvvon ovdalii
eará bártniid lea Ašer.
Ehccoset su su vieljat,
buonjostehkos son julggiidis oljjus.
25 Lehkoset du smarttit
ruovddis ja bronssas,
nugo du beaivvit leat,
nu lehkos du fápmu.
26 Ii oktage leat nugo Ješuruna Ipmil!
Son riide almmi badjel veahkehit du,
allatvuođastis son riide balvvaid alde.
27 Du ássansadji lea agálaš Ipmil,
deike vuolás ollet Agálačča gieđat.
Son ájii du vašálaččaid du ovddas
ja gohčui du duššadit sin.
28 Nu Israel oažžu ássat oadjebassan,
Jakoba nálli beassá orrut ráfis
dan eatnamis mas lea gordni ja viidni,
doppe gos almmis goaiku suoldni.
29 Lihkolaš leat don, Israel,
gii lea nugo don?
Don leat álbmot maid Hearrá beastá.
Son lea du suodjaleaddji galba,
du miehkki mii vuoitá.
Du vašálaččat dohkkestuvvet dutnje,
sin alážiid don duolmmat.