Moses jápmá
1 Moses goarkŋui Moaba jalgadasas Nebovárrái, Pisga čohkkii mii lea Jeriko buohta. Hearrá čájehii sutnje oppa eatnama: Gileada gitta Dana rádjái, 2 oppa Naftali, de Efraima ja Manasse eatnamiid ja oppa Juda eatnama gitta oarjemeara rádjái 3 ja Negeva ja Jordana duolbadasa, dan leagi mii ollá Jerikos, Pálbmagávpogis, gitta Soara rádjái. 4 Hearrá celkkii sutnje: “Dát lea dat eanan maid mun vuordnumiin lohpidin Abrahamii, Isakii ja Jakobii addit sin nállái. Mun divttán du oaidnit dan iežat čalmmiiguin, muhto don it beasa dohko.”
5 Moses, Hearrá bálvaleaddji, jámii Moaba eatnamii, nugo Hearrá lei cealkán. 6 Hearrá hávdádii su muhtun leahkái Moaba eatnamii, Bet-Peora buohta; ii oktage dieđe vel otná beaivvige gokko su hávdi lea. 7 Moses lei čuođiguoktelogijahkásaš go jámii, muhto su čalmmit eai lean sevnnjodan iige son lean vuoimmehuvvan. 8 Israellaččat čirro Mosesa Moaba jalgadasain golbmalogi beaivvi, dassá go moraštanáigi nogai.
9 Viissisvuođa vuoigŋa devddii Josua, Nuna bártni, danin go Moses lei bidjan gieđaid su ala. Israellaččat jeagadedje su ja dahke daid rávvagiid mielde, maid Hearrá lei addán Mosesii.
10 Israelis ii šat čuožžilan dakkár profehta go Moses geainna Hearrá sártnui muođus muhtui, 11 gean Hearrá vuolggahii Egyptii dahkat mearkkaid ja oavdduid faraoi ja buot su bálvaleddjiide ja oppa su eatnamii, 12 ja buot daid stuorra ja hirbmatlaš daguid maid Moses dagai gievrras gieđain oppa Israela oaidnut.