Viđát Mosesgirji

Gula, Israel!

¹ Dát leat dat báhkkomat, lágat ja njuolggadusat maid Hearrá, din Ipmil, lea gohččon mu oahpahit didjiide, vai dii doallabehtet daid dan eatnamis maid dál mannabehtet váldit oapmineattet. ² Jos dii ballabehtet Hearrás, Ipmilisttádet, dii ja din mánát ja mánáid mánát, ja oppa eallináiggi doallabehtet buot su lágaid ja báhkkomiid maid mun attán didjiide, de dii eallibehtet guhká. ³ Gullet, israellaččat! Dollet daid dárkilit, vai didjiide geavvá bures ja dii šaddabehtet hui eatnagin dan eatnamis mas golgá mielki ja honnet. Ná Hearrá, din áhčiid Ipmil, lea lohpidan didjiide.

⁴ Gula, Israel! Hearrá lea min Ipmil, Hearrá lea okta. ⁵ Ráhkis Hearrá, Ipmilat, oppa váimmus ja oppa sielus ja oppa fámus. ⁶ Vurke váibmosat dáid gohččumiid maid mun odne attán dutnje. ⁷ Don galggat cieggadit daid mánáidasat ja sárdnut daid go čohkkát viesustat ja go váccát olgun, go velledat ja go lihkat. ⁸ Čana daid mearkan giehtasat ja ane daid dovdomearkan gállustat. ⁹ Čále daid iežat viesu uksastoalppuide ja iežat gávpotpoarttaide.

¹⁰ Hearrá, din Ipmil, doalvu din dál dan eatnamii maid son addá didjiide, nu go son lohpidii váliin din áhčiide Abrahamii, Isakii ja Jakobii. Dii oažžubehtet oapmineattet stuorra ja čáppa gávpogiid maid ehpet leat huksen, ¹¹ viesuid maid dievva leat buotlágán buorit maid ehpet leat háhkan, arvegáivvuid maid ehpet leat čuollan, ja viidnegárddiid ja oliivagárddiid maid ehpet leat gilván. Go dii dasto borrabehtet ja gallánehpet, ¹² de váruhehket vajáldahttimis Hearrá guhte buvttii din Egyptas, šlávvaviesus. ¹³ Ballet Hearrás, Ipmilisttádet, bálvalehket su ja vurdnot su nammii. ¹⁴ Dii ehpet oaččo bálvalit eará ipmiliid maid din ránnjáálbmogat bálvalit, ¹⁵ dasgo Hearrá, din Ipmil, lea din gaskkas, ja son lea áŋgiris Ipmil. Allet moaráhuhte Hearrá, Ipmileattet, danne go son sáhttá duššadit din eatnama alde. ¹⁶ Allet geahččal Hearrá, Ipmileattet, nugo dagaidet Massas. ¹⁷ Dollet dárkilit báhkkomiid, mearrádusaid ja lágaid maid Hearrá, din Ipmil, lea addán didjiide. ¹⁸ Dahket dan mii lea riekta ja buorre Hearrá čalmmiin. Dalle didjiide geavvá bures, ja dii beassabehtet váldit oapmineattet dan buori eatnama maid Hearrá váliin lohpidii din áhčiide. ¹⁹ Hearrá ádjá eret buot din vašálaččaid, nugo son lea sárdnon.

²⁰ Du bárdni jearrá dus boahtti beivviid: “Maid mearkkašit dat mearrádusat, lágat ja njuolggadusat maid Hearrá, min Ipmil, lea addán didjiide?” ²¹ Vástit dalle bárdnásat: “Mii leimmet farao šlávat Egyptas, muhto gievrras gieđain Hearrá buvttii min Egyptas. ²² Hearrá dagai Egyptas min čalmmiid ovddas stuorra mearkkaid ja oavdduid mat bukte lihkohisvuođa faraoi ja oppa su hovvii. ²³ Muhto min son buvttii doppe ja oahpistii min deike, vai beassá addit midjiide eatnama maid son váliin lei lohpidan min áhčiide. ²⁴ Hearrá, min Ipmil, gohčui min doallat buot dáid lágaid ja ballat sus, vai midjiide geavvá bures buot beivviideamet ja vai son diktá min eallit nugo leat eallán dán beaivvi rádjáige. ²⁵ Jos mii doallat oskkáldasat oppa dán lága maid Hearrá, min Ipmil, lea addán, de Hearrá atná min vanhurskkisin.”