Buorre eanan
1 Dollet oskkáldasat oppa dan lága maid mun odne attán didjiide, vai beassabehtet eallit ja eatnánit ja váldit oapmineattet dan eatnama maid Hearrá vuordnumiin lohpidii din áhčiide. 2 Muitet mo Hearrá, din Ipmil, lea oahpistan din meahcis njealljelogi jagi. Son bagadii din ja geahččalii din vai beassá diehtit, áigubehtetgo dii doallat su báhkkomiid vai ehpet. 3 Son bagadii din nelggiin ja biepmai din mannain maid ehpet dii eaige din áhčitge dovdan. Son dáhtui oahpahit didjiide ahte olmmoš ii eale dušše láibbis, muhto juohke sánis mii boahtá Hearrá njálmmis. 4 Dan njealljelogi jagis din biktasat eai nohkan eaige din juolggit bohtanan. 5 Ipmirdehket dalle ahte Hearrá, din Ipmil, bagada din nugo olmmái bagada iežas bártni. 6 Dollet Hearrá, Ipmileattet, báhkkomiid, nu ahte vádjolehpet su geainnuid ja ballabehtet sus.
7 Hearrá, din Ipmil, doalvu din dan buori eatnamii gos leat jogažat ja ádjagat ja gos čiekŋalasa čázit golggiidit legiin ja váriin, 8 nisu ja bivggi, viidnemuora, fiikonmuora ja granáhtaehpelmuora, oliivamuora ja honnega eatnamii. 9 Dan eatnamis dii ehpet dárbbaš eallit vátnivuođas iige dis váillo mihkkege. Dan eatnama geađggit leat ruovdi, ja dan váriin dii sáhttibehtet boltut veaikki. 10 Go dii dalle borrabehtet gallás, de máidnot dalle Hearrá, Ipmileattet, go son lea addán didjiide dan buori eatnama. 11 Váruhehket vajáldahttimis Hearrá, Ipmileattet. Dollet su báhkkomiid, njuolggadusaid ja lágaid maid mun odne attán didjiide. 12 Go dii borrabehtet gallás ja huksebehtet čáppa viesuid ja ássabehtet dain, 13 go din gusat ja sávzzat eatnánit, go didjiide čoggo silba ja golli ja buot din opmodat lassána, 14 de váruhehket čeavlumis ja vajáldahttimis Hearrá, Ipmileattet, gii buvttii din Egyptas, šlávvaviesus. 15 Son oahpistii din čađa stuorra ja hirpmus meahci gos ledje dievva mirkogearbmašat ja skorpiovnnat, čađa čázehis goikeeatnama. Son divttii čázi golggiidit garra bávttis, 16 ja meahcis son attii didjiide manna borrat, biepmu maid din áhčit eai dovdan, danne go son dáhtui bagadit ja geahččalit din ja maŋimustá atnit didjiide buorrevuođa. 17 Allet gátte ahte dii lehpet iežadet fámuin ja iežadet gievrras gieđain háhkan alcceseattet dan riggodaga. 18 Muitet ahte Hearrá, din Ipmil, addá didjiide fámu háhkat riggodaga, danin go dán beaivvige son bisuha lihtu maid dagai din áhčiiguin ja maid nannii váliin.
19 Muhto jos dii vajáldahttibehtet Hearrá, Ipmileattet, ja vádjolehpet eará ipmiliid maŋis ja bálvalehpet ja rohkadallabehtet daid, de mun duođaštan didjiide odne ahte dii duššabehtet. 20 Nugo álbmogat maid Hearrá duššada din ovddas, nu diige duššabehtet, jos dii ehpet gula Hearrá, din Ipmila.