Hearrá addá vuoittu
1 Gula, Israel! Don manat dál Jordana rastá vuoitit álbmogiid mat leat stuoribut ja gievrrabut go don, stuorra gávpogiid maid muvrrat ollet gitta almmi rádjái. 2 Doppe ásset anaklaččat, dat stuorra allašattot álbmot maid don dovddat ja geaid birra leat gullan daddjojuvvon: “Gii bihtá anaklaččain?” 3 Dihtet dalle odne ahte Hearrá, din Ipmil, ieš manná din ovddas duššadeaddji dollan. Son duššada sin, son diktá din vuolidit sin. Dii ádjibehtet sin eret ja duššadehpet sin hoahpus, nugo Hearrá lea lohpidan didjiide.
4 Go Hearrá, din Ipmil, ádjá sin eret din ovddas, de allet gátte ahte Hearrá diktá din boahtit dán eatnamii ja váldit dan oapmineattet iežadet vanhurskkisvuođa dihte. Ii, daid eará álbmogiid ipmilmeahttunvuođa dihte Hearrá, din Ipmil, ádjá daid eret din ovddas. 5 Dii ehpet beasa boahtit daid eatnamii ja váldit daid oapmineattet danin go dii lehpet vanhurskásat ja vuoiggalaččat, muhto Hearrá, din Ipmil, ádjá daid álbmogiid eret din ovddas daid ipmilmeahttunvuođa dihte, ja danin go son dáhttu deavdit lohpádusa maid son vuordnumiin attii din áhčiide Abrahamii, Isakii ja Jakobii. 6 Dihtet dalle ahte Hearrá, din Ipmil, ii atte didjiide dán buori eatnama oapmineattet din iežadet vanhurskkisvuođa dihte, danin go dii lehpet gážžáris álbmot.
Gollegálbi ja Mosesa rohkadus álbmoga ovddas
7 Muitet dan, alletge goassege vajáldahte mo dii meahcis moaráhuhtiidet Hearrá, Ipmileattet. Dan beaivvi rájes go dii vulggiidet Egyptas gitta dassážii go bođiidet dán báikái, dii lehpet nággáruššan Hearrá vuostá. 8 Horebis dii moaráhuhtiidet Hearrá. Son moaráhuvai nu ahte dáhtui duššadit din. 9 Go mun ledjen gorgŋon várrái váldit vuostá geađgetávvaliid, daid távvaliid mat nannejedje lihtu maid Hearrá dagai dinguin, mun orron váris borakeahttá ja jugakeahttá njealljelogi beaivvi ja njealljelogi ija. 10 Hearrá attii munnje dan guokte geađgetávvala maidda son lei čállán iežas suorpmain. Dain ledje buot dat sánit maid Hearrá sártnui didjiide dola siste, dalle go dii leiddet čoagganan vári vuollái. 11 Go dat njealljelogi beaivvi ja njealljelogi ija ledje gollan, de Hearrá attii munnje dan guokte geađgetávvala, lihtutávvaliid.
12 Ja Hearrá celkkii munnje: “Njieja dáppe hoahpus, danne go du álbmot maid buktet Egyptas, lea dahkan issoras dagu. Sii leat juo gáidan dan geainnus maid mun gohččon sin vádjolit. Sii leat leiken alcceseaset ipmilgova.” 13 Hearrá celkkii vel munnje: “Mun oainnán ahte dát álbmot lea gážžáris álbmot. 14 Divtte mu orrut, de mun duššadan dan ja sihkun dan nama eatnamis. Muhto du mun dagan gievrrat ja stuorit álbmogin go dat.”
15 Mun njidjen buolli váris, ja mus ledje dat guokte lihtutávvala gieđas. 16 Mun oidnen ahte dii leiddet suddudan Hearrá, Ipmileattet, vuostá, ahte leiddet leiken alcceseattet burrogálbbi ja nu gáidan dan geainnus man Hearrá gohčui din vádjolit. 17 Mun dohppejin goappašiid gieđaiguin dan guokte távvala, bálkestin daid ja cuvkejin daid din oaidnut. 18 Dasto mun fas luoitádin Hearrá muođuid ovdii, ja nugo ovddit hávege mun orron njealljelogi beaivvi ja njealljelogi ija borakeahttá ja jugakeahttá dan stuorra suttu dihte maid dii dagaidet go barggaidet dan mii lei bahá Hearrá čalmmiin ja moaráhuhtiidet su. 19 Mun oainnat ballen Hearrá buolli moaris, danin go son lei nu moaráhuvvan ahte áiggui duššadit din. Muhto Hearrá gulai mu vel dan hávege. 20 Maiddái Aronii Hearrá lei nu moaris ahte áiggui duššadit su. Danin mun rohkadallen dalle maiddái Arona ovddas. 21 Mun válden din suttolaš duoji, burrogálbbi, ja bolden dan. Mun cuvkejin dan ja ferdnejin dan gavjan, ja gavjja mun botkalin jogažii mii golggai váris.
22 Dii moaráhuhtiidet Hearrá maiddái Taberas, Massas ja Kibrot Hattaavas. 23 Nu lei maid dalle go Hearrá áiggui vuolggahit din Kadeš Barneas ja celkkii: “Mannet dan eatnamii maid mun lean addán didjiide, ja váldet dan oapmineattet!” Dalle dii gážžárušaidet Hearrá, Ipmileattet, gohččuma vuostá. Dii ehpet luohttán sutnje ehpetge gullan su. 24 Dii lehpet nággáruššan Hearrá vuostái nu guhká go mun lean dovdan din.
25 Mun luoitádin nappo Hearrá muođuid ovdii ja veallájin das njealljelogi beaivvi ja njealljelogi ija, danne go Hearrá lei áitán duššadit din. 26 Mun rohkadallen Hearrá: “Hearrá, mu Ipmil, ale duššat iežat álbmoga, iežat opmodaga, maid don stuorisvuođastat leat beastán ja buktán Egyptas gievrras gieđain. 27 Muitte bálvaleddjiidat Abrahama, Isaka ja Jakoba, alege beroš dán álbmoga gážžárvuođas, ipmilmeahttunvuođas ja suttus. 28 Muđui dan eatnama olbmot gos don buktet min, dadjet: ‘Hearrá ii nagodan doalvut sin dan eatnamii maid lei sidjiide lohpidan, muhto vašuhii sin ja dan dihte ájii sin meahccái jápmit.’ 29 Muhto siihan leat du álbmot ja du opmodat, geaid don buktet Egyptas stuorra fámuin ja bajiduvvon gieđain.”