1 Gii lea viisá veardásaš,
gii máhttá čilget dan mii dáhpáhuvvá?
Viissisvuohta čuvge olbmo muođuid,
litnuda su gážžáris ámadaju.
2 Jeagat gonagasa gohččumiid:
Don leat vurdnon sutnje oskkáldasvuođa
Ipmila nammii.
3 Ale hohpohala vuolgit su luhtte
alege searvva mange bahás áššái,
danin go gonagas dahká maid dáhttu.
4 Gonagasa sátni lea láhka.
Gii duostá dadjat sutnje: “Maid don dagat?”
5 Dat gii jeagada su gohččuma,
ii dáhto diehtit bahás juonaid;
viissis dovdá váimmustis
rievttes áiggi ja vuogi,
6 danin go juohke dahkui
lea iežas áigi ja vuohki.
Olbmo deaddá lossadit bahás noađđi:
7 Son ii dieđe mii dáhpáhuvvá boahtteáiggis,
gii máhttá muitalit dan sutnje?
8 Ii oktage ráđđe biekka,
nu ahte sáhttá caggat dan,
iige oktage ráđđe iežas jápminbeaivvi.
Ii oktage beasa eret soađis.
Bahávuohta ii gájo ipmilmeahttuma.
9 Buot dán mun gávnnahin, go dárkojin buot mii dáhpáhuvvá beaivváža vuolde dan áiggi go olmmoš ráđđe nuppi olbmo, sutnje oasehisvuohtan. 10 De mun oidnen ahte bahás olbmot biddjojuvvojedje hávdái, muhto geat ledje dahkan vuoigatvuođa, dat šadde vuolgit bassi báikkis, ja sin muitu vajálduvai gávpogis. Datge lea duššálašvuohta.
11 Go bahávuođa duopmu ii boađe dallánaga, de olbmot roahkasmuvvet dahkat bahá. 12 Suttolaš dahká bahá čuođi geardái ja dattetge eallá guhká. Almmatge mun dieđán ahte dasa gii ballá Ipmilis, geavvá bures su ipmilbalolašvuođa dihte, 13 ja ahte ipmilmeahttumii ii geava bures: Go son ii bala Ipmilis, de su eallima beaivvit vásset dego suoivvan. 14 Dátge lea eatnama alde duššálašvuohta: Leat vuoigatlaččat geaidda geavvá dego sii livčče dahkan vearrivuođa, ja leat ipmilmeahttumat geaidda geavvá dego sii livčče dahkan riekta. Mun dajan: Dat lea duššálašvuohta.
15 De mun rámidin ilu, dainna go olbmui ii leat beaivváža vuolde eará buorre go borrat, juhkat ja leat ilus. Illu čuovvu olbmo su rahčamušaid siste daid eallinbeivviid maid Ipmil addá sutnje beaivváža vuolde.
16 Go mun geahččalin oahppat dovdat viissisvuođa ja guorahallat dan barggu maid olbmot barget eatnama alde ijat beaivái, nu ahte eai oaččo oppa nahkáriidge, 17 de mun oidnen ahte olmmoš ii sáhte ipmirdit Ipmila olles daguid, buot dan mii dáhpáhuvvá beaivváža vuolde. Vaikko son ražašii ja dutkkašii man ollu beare, de son ii oaččo das čielgasa. Jos velá viissis olmmoš dajašiige ahte son ipmirda, de son almmatge ii ádde.