Gi hjerteStøtt nettbibelen
Gå til forsiden

Paulusa girji efesoslaččaide

1

Dearvvuođat

1 Paulus, Ipmila dáhtus Jesus Kristusa apostal, dearvvaha Efesosa bassi olbmuid geat oskot Kristus Jesusii.

2 Árbmu lehkos didjiide ja ráfi Ipmilis, min Áhčis, ja Hearrá Jesus Kristusis!

Máidnun

3 Máidnojuvvon lehkos

Hearrámet Jesus Kristusa Ipmil ja Áhčči,

guhte Kristusis lea min buressivdnidan

buot dan Vuoiŋŋa

buressivdnádusain mii lea almmis.

4 Kristusis son lea min válljen

ovdal go máilbmi vuođđuduvvui,

vai mii livččiimet basit

ja láitemeahttumat su ovddas ráhkisvuođas.

5 Son lea ovddalgihtii

mearridan midjiide

máná vuoigatvuođa iežas luhtte

Jesus Kristusa bokte.

Dat lei su dáhtu mielde,

6 dan árpmu gudnin ja rámádussan,

dan maid son attii midjiide

iežas ráhkis bártni bokte.

7 Su siste ja su varas mii leat lonistuvvon,

ja leat ožžon rihkkumiid ándagassii addojumi.

Nu rikkis lea Ipmila árbmu

8 mainna son lea midjiide golggahan

buot viissisvuođa ja áddejumi.

9 Son lea almmuhan midjiide

dáhtus čiegusvuođa,

dan mearrádusa Kristusa birra

maid son álggu rájes lei dahkan,

10 dan maid son ollašuhttá

go áigi dievvá:

Son dáhtui ovttastahttit buot Kristusis,

buot mii lea almmis ja eatnama alde.

11 Ipmil lea maiddái addán Kristusis

midjiide árbeoasi,

nugo son lei áigon

ja ovdal juo mearridan,

son guhte dahká buot

maid lea dáhtton ja mearridan.

12 Dan dihte mii geat ovdal juo

leat ožžon dorvvastit Kristusii,

fertet eallit Ipmila hearvásvuođa

rámádussan.

13 Kristusa siste maiddái dii dál oskubehtet

go lehpet gullan duohtavuođa sáni,

iežadet bestojumi evangeliuma.

Go dii oskubehtet sutnje,

de dii lehpet maiddái ožžon seailan

lohpiduvvon Bassi Vuoiŋŋa.

14 Son lea min árbeoasi dáhkádus,

son dáhkida midjiide lonástusa

Ipmila hearvásvuođa rámádussan.

Giittus ja rohkadus

15 Dan rájes go mun gullen ahte dii oskubehtet Hearrá Jesusii ja ráhkistehpet buot bassi olbmuid, 16 de mun in heaitte giitimis Ipmila din ovddas go muittán din rohkadusainan. 17 Mun rohkadalan ahte Hearrámet Jesus Kristusa Ipmil, hearvásvuođa Áhčči, attášii didjiide viisodaga ja almmustusa Vuoiŋŋa, vai dii oahppabehtet dovdat su. 18 Vare son attášii čuovgga din váimmu čalmmiide, vai oainnášeiddet makkár doivui son lea din rávkan, man rikkis ja hearvás árbbi son addá bassi olbmuide 19 ja man mihtitmeahttun stuoris su fápmu lea midjiide geat oskut. Dat lea seammá veagalaš fápmu maid son čájehii 20 go čuoččáldahtii Kristusa jábmiid luhtte ja bijai su čohkkát iežas olgeš gieđa beallái almmis, 21 badjel buot válddiid, fámuid ja hearrávuođaid, badjel buot namaid mat namahuvvojit dálá áiggis ja maiddái boahtti áiggis. 22 Ipmil bijai buot su julggiid vuollái, ja su son bijai buot bajábeallái girku oaivin, 23 mii lea Kristusa rumaš ja su dievasvuohta, su gii deavdá buot buohkain.

Les vår personvernserklæring
Skjemaet er beskyttet av reCAPTCHA og Googles Privacy Policy og Terms of Service gjelder.