Ester šaddá dronnegin
1 Go muhtun áigi lei gollan ja gonagas Xerxesa moarri lotkkodan, de son muitái maid Vašti lei dahkan ja mii su hárrái lei mearriduvvon. 2 Gonagasa hoavvaolbmát geat bálvaledje su, dadje hearráseaset: “Ohccojuvvoset gonagasa várás nuorra čáppa eadneviđá nieiddat. 3 Gonagas mearridehkos juohke provinsii olbmáid čohkket buot nuorra čáppa eadneviđá nieiddaid Susa ladni haremii. Hoavvaolmmái Hegaja, gonagasa haremgáhttejeaddji, geahčus sii ožžot čábbodatdivššu, 4 ja dat nieida geasa gonagas liiko eanemusat, šaddá dronnegin Vašti sadjái.” Gonagas liikui neavvagii, ja son dagai nu.
5 Susa ladnis ásai juvddálaš olmmái gean namma lei Mordekai. Son lei Benjamina čearddas, ja su áhčči lei Jair, Kiša bártni Šimi bárdni. 6 Son gulai dan jovkui mii dolvojuvvui eret Jerusalemis dalle go Babylonia gonagas Nebukadnesar doalvvui veagal Juda gonagasa Jekonja. 7 Mordekajis lei biebmonieidan čeazis nieida Hadassa, gii gohčoduvvui maiddái Esterin. Nieiddas ii lean šat áhčči iige eadni. Nieida lei šođbat ja čáppat, ja Mordekai lei váldán su iežas nieidan su vánhemiid jápmima maŋŋil.
8 Go gonagasa gohččun ja mearrádus šattai dovddusin, de čohkkejuvvojedje ollu nuorra nieiddat Susa ladnái Hegai geahču vuollái. Maiddái Ester vižžojuvvui gonagasa šlohttii ja biddjojuvvui haremfávtta Hegai gehččui. 9 Nuorra nieida lei haremfávtta miela mielde ja son liikui sutnje. Danne Hegai dakkavide lágidii Esterii dan čábbodatdivššu ja dan borramuša mii sutnje gulai, ja attii sutnje čieža válljejuvvon nissonbálvvá gonagasa šloahtas. De son sirddii Estera ja su bálvváid harema buoremus lanjaide. 10 Ester ii lean muitalan man álbmogii ja man sohkii son gulai, danne go Mordekai lei gieldán su muitaleames dan. 11 Juohke beaivvi Mordekai váccii ovddos maŋos haremšilju meattá. Son dáhtui diehtit geavaigo Esterii bures ja mii sutnje dahkkojuvvui.
12 Guhtege nieida galggai mannat iežas vuorus gonagas Xerxesa lusa. Ovdal dan nieida lei ožžon guoktenuppelohkái mánu čábbodatdivššu, nugo lei mearriduvvon. Guhtta mánu son lei dikšojuvvon myrraoljjuin ja guhtta mánugis balsamvuoidasiin ja eará čábbodatávdnasiiguin. 13 Go nieida manai gonagasa lusa, de son oaččui váldit haremis gonagasa šlohttii buot maid siđai. 14 Son manai dohko eahkedis, ja iđedis son máhcai nuppi haremii, mii lei hoavvaolmmái Šaašgasa geahčus. Son fáktii gonagasa liigeáhkáid. Gonagasa lusa nieida ii šat beassan, muđui go jos gonagas liikui sutnje ja rávkkai su lusas nama mielde.
15 Go šattai Estera, Mordekaja čeazi Abihajila nieidda, Mordekaja biebmonieidda, vuorru vuolgit gonagasa lusa, de son ii sihtan mielde eará go dan maid Hegai, gonagasa haremgáhttejeaddji, neavvui su váldit. Buohkat geat oidne Estera, liikojedje sutnje. 16 Ester dolvojuvvui šlohttii gonagas Xerxesa lusa gonagasa čihččet ráđđenjagi logát mánus, tebetmánus. 17 Son šattai gonagassii ráhkkáseabbon go buot eará nissonat. Son liikui Esterii eambbo go buot eará nieiddaide. Son bijai Estera oaivái gonagaslaš kruvnnu ja dagai su dronnegin Vašti sadjái. 18 Gonagas lágidii Estera gudnin stuorra guossemállásiid oaivámuččaidasas ja virgeolbmáidasas, mieđihii provinssaide vearrogeahpádusaid ja attii attáldagaid gonagaslaš árvvasvuođain.
19 Dalle go nieiddat fas čohkkejuvvojedje, de Mordekai lei bálvaleamen gonagasa poarttas. 20 Ester ii lean muitalan iežas soga iige álbmoga, danne go Mordekai lei gieldán su. Son jeagadii ain Mordekaja, nugo son lei dahkan dalle go lei leamaš su biebmonieidan.
21 Dan áigge go Mordekai lei bálvaleamen gonagasa poarttas, de Bigtan ja Tereš, guokte gonagasa hoavvaolbmá, šielbmafávttat, suhtaiga gonagas Xerxesii ja ozaiga liibba goddit su. 22 Mordekai gulai dan ja muitalii dronnet Esterii, gii almmuhii dan gonagassii Mordekaja nammii. 23 Ášši guorahallojuvvui, ja go dat gávnnahuvvui duohtan, de goappašagat hoavvaolbmát harccastuvvuiga murrii. Dáhpáhus čállojuvvui gonagasa muitalusaid girjái.