Sabbatbáhkkon
1 Moses rávkkai čoahkkái oppa Israela searvegotti ja dajai: “Ná Hearrá lea gohččon din dahkat: 2 Guhtta beaivvi vahkus galgabehtet bargat, muhto čihččet beaivvi atnet bassin. Dat lea sabbat, Hearrái basuhuvvon vuoiŋŋastanbeaivi. Juohkehaš gii bargá dan beaivvi, galgá goddojuvvot. 3 Allet cahkket dola sabbatbeaivvi, gos dal ásažehpetge.”
Álbmoga attáldagat
4 Moses dajai oppa Israela searvegoddái: “Ná Hearrá lea gohččon: 5 Čohkkejehket attáldagaid Hearrái. Juohkehaš gean váibmu lea dasa mieđis, galgá buktit attáldahkan Hearrái golli, silbba ja bronssa, 6 ruksesalit, purpurrukses ja karmosinrukses ulluid, fiinna beallemasaid ja gáiccaguolggaid, 7 ruoksadin báidnojuvvon vierccanáhkiid, delfiinnanáhkiid ja akasiamuora, 8 oljju lámppáid várás, hádjaávdnasiid vuoidanoljju ja njálggahájat suovvasiid várás, 9 ja onyksgeđggiid ja eará divrras geđggiid efoda ja raddeleahpi várás.
10 Buot din duojárat geat leat čeahpit duddjot, galget boahtit duddjot buot maid Hearrá lea gohččon: 11 bassibáikki goađi ja dan siskkit ja olggut loavdagiid, rohkiid, seaidnefielluid, doaresmuoraid, stoalppuid ja daid julggiid, 12 árkka oktan guoddinstákkuiguin ja soabahussajiin ja árkka gokči ovdaloavdagiin, 13 beavddi oktan guoddinstákkuiguin, dárbašiiguin ja oaffarláibbiiguin, 14 lámpájuolggi oktan dárbašiiguin ja lámppáiguin, oljju lámppáid várás, 15 suovasáltára oktan guoddinstákkuiguin, vuoidanoljju ja njálggahájat suovvasiid, gokčasa goađi uksaráigái, 16 boaldinoaffaráltára ja dan bronsabildda, guoddinstákkuid ja buot dan dárbašiid, basadanlihti ja dan juolggi, 17 ovdašilju loavdagiid oktan stoalppuiguin ja julggiiguin, ovdašilju poartta gokčasa, 18 goađi ja ovdašilju giddennávlliid oktan báttiiguin, 19 virgebiktasiid bassibáikki bálvalusa, báhppa Arona bassi biktasiid ja su bártniid báhpabiktasiid várás.”
20 Oppa Israela searvegoddi vulggii Mosesa luhtte. 21 De sii bohte ruoktot, ja buohkat geain lei miella ja hállu, bukte Hearrái attáldagaid almmustusgoađi huksema, dan bálvalusa ja bassi biktasiid várás. 22 Sii bohte, sihke dievddut ja nissonat, buohkat geat dáhtto addit, ja bukte riskkuid ja bealljerieggáid, suorbmasiid, čeabetčiŋaid ja máŋggalágán gollediŋggaid. Juohkehaš buvttii golli oaffarattáldahkan Hearrái. 23 Buohkat geain ledje ruksesalit, purpurrukses ja karmosinrukses ullut, fiinna beallemasat, gáiccaguolggat, ruoksadin báidnojuvvon vierccanáhkit ja delfiinnanáhkit, bukte daid. 24 Juohkehaš gii siđai addit silbba dahje bronssa, buvttii dan attáldahkan Hearrái, ja juohkehaš geas lei akasiamuorra huksenbargguid várás, buvttii dan. 25 Juohke nisson gii lei čeahppi duddjot, bonii láiggi ja buvttii bodnojuvvon ruksesalit, purpurrukses ja karmosinrukses láiggiid ja fiinna beallemasláiggiid. 26 Buot nissonat geain lei miella ja čehppodat, botne láiggi gáiccaguolggain. 27 Oaivámuččat bukte onyksgeđggiid ja eará divrras geđggiid efoda ja raddeleahpi várás, 28 ja maiddái hádjaávdnasiid ja oljju lámppá, vuoidanoljju ja njálggahájat suovvasiid várás. 29 Buot israellaš olbmát ja nissonat geat hálidedje addit juoidá daidda dujiide maid Hearrá Mosesa bokte lei gohččon duddjohit, bukte eaktodáhtolaš attáldagaid Hearrái.
Duojárat rávkojuvvojit ráhkadit goađi
30 Moses dajai israellaččaide: “Hearrá lea rávkan Uri bártni Besalela, Hura áddjuba Juda čearddas, 31 ja lea deavdán su Ipmila vuoiŋŋain, viisodagain, jirpmiin, dieđuin ja čehppodagain 32 hutkat ja duddjot dáiddolaš dujiid gollis, silbbas ja bronssas, 33 sadjit ja giddet čikŋageđggiid, vuollat muora ja duddjot buotlágán gáibideaddji dujiid. 34 Hearrá lea addán sutnje ja Oholiabii, Ahisamaka bárdnái Dana čearddas, dáiddu oahpahit earáid. 35 Son lea deavdán sudno viissisvuođain, nu ahte soai máhttiba duddjot buotlágáš gollerávdi ja snihkkára dujiid, gođđit gággásiid ruksesalit, purpurrukses ja karmosinrukses ulloláiggis ja fiinna beallemasláiggis, hervet daid ja duddjot eará gákkesgođđi dujiidge. Dát olbmát máhttiba hutkat ja duddjot buotlágáš dujiid.