Esekiel

Jerusalema oaivámuččaid duopmu

¹ Vuoigŋa loktii mu ja doalvvui mu Hearrá tempela nuortapoartta lusa, dan poartta mii lea nuorttas guvlui. Poartta uksaráiggi guoras ledje guoktelogivihtta olbmá. Sin gaskkas mun oidnen Jaasanja, Assura bártni, ja Pelatja, Benaja bártni, geat gulaiga álbmoga oaivámuččaide. ² Hearrá celkkii munnje: “Olmmoš, dát leat dat gávpoga olbmát geat hutket vearrivuođa ja addet bahás ráđiid. ³ Sii dadjet: ‘Ii leat vuos dárbu hukset viesuid. Gávpothan lea báhti ja mii leat biergu.’ ⁴ Dan dihte profehtastala, olmmoš, profehtastala sin vuostá!” ⁵ Dalle bođii mu badjelii Hearrá vuoigŋa, ja son gohčui mu dadjat: “Ná cealká Hearrá: Mun dovddan din ságaid, israellaččat, mun dieđán maid dii jurddašehpet. ⁶ Dii lehpet sorbmen ollugiid dán gávpogis ja deavdán gáhtaid jábmiiguin. ⁷ Dan dihte cealká Hearrá Ipmil: Gottáhallan olbmot geaid dii lehpet čobmen deike, leat biergu, ja din gávpot lea báhti, muhto din mun doalvvun dáppe eret. ⁸ Miehkis dii ballabehtet, ja miehki mun geigen din vuostá, cealká Hearrá Ipmil. ⁹ Mun doalvvun din eret gávpogis, attán din vierroolbmuid gihtii ja ollašuhtán din duomu. ¹⁰ Dii gahččabehtet miehkkái, Israela ráji alde mun dubmen din. Dalle dii ipmirdehpet ahte mun lean Hearrá. ¹¹ Gávpot ii šatta didjiide báhtin ehpetge dii šatta dasa biergun. Israela ráji alde mun dubmen din. ¹² Dalle dii ipmirdehpet ahte mun lean Hearrá, dii geat ehpet doahttalan mu báhkkomiid ehpetge doallan mu lágaid, muhto doalaidet birasálbmogiiddádet lágaid.”

¹³ Go mun ledjen profehtastallamin, de jámii Pelatja, Benaja bárdni. Dalle mun luoitádin muđolassii ja čurvon alla jienain: “Vuoi, Hearrá! Áiggutgo don duššadit buohkaid geat vel leat báhcán Israelis?”

Jeđđehus eret dolvojuvvon olbmuide

¹⁴ Munnje bođii dát Hearrá sátni: ¹⁵ Olmmoš, ná dadjet Jerusalema ássit du vieljaid ja fulkkiid birra ja oppa Israela álbmoga birra: “Sii leat guhkkin Hearrás. Midjiide dát eanan lea addojuvvon árbin ja opmodahkan.” ¹⁶ Dan dihte cealkke: Ná cealká Hearrá Ipmil: Mun lean dolvon sin guhkás álbmogiid gaskii ja biđgen sin vieris eatnamiidda, muhto sii leat goit sáhttán bálvalit mu dain eatnamiin maiddái leat šaddan. ¹⁷ Dan dihte cealkke: Ná cealká Hearrá Ipmil: Mun čohkken din álbmogiid siste, buvttán din dain eatnamiin gosa dii lehpet biđgejuvvon ja attán didjiide Israela eatnama.

¹⁸ Go sii leat máhccan, de sii jávkadit buot fasttes govaid ja visot eartnjehas vieruid. ¹⁹ Mun attán sidjiide ođđa váimmu ja deavddán sin ođđa vuoiŋŋain. Mun válddán sin rattis geađgeváimmu ja attán sidjiide oažževáimmu, ²⁰ vai sii doahttalit mu báhkkomiid, dollet mu lágaid ja ellet daid mielde. Dalle sii leat mu álbmot, ja mun lean sin Ipmil. ²¹ Muhto daidda geat ain doallánit fasttes govaidasaset ja eartnjehas vieruidasaset, mun mávssahan sin daguid, cealká Hearrá Ipmil.

²² Kerubat bajidedje soajáideaset. Jorrit bohte kerubaid mielde, ja Israela Ipmila hearvásvuohta lei kerubaid badjel. ²³ Hearrá hearvásvuohta badjánii gávpogis ja orustii dan várrái mii lea gávpogis nuorttas. ²⁴ Vuoigŋa loktii mu ja oainnáhusas maid Ipmila vuoigŋa attii dat doalvvui mu Kaldeai, daid eret dolvojuvvon olbmuid lusa. ²⁵ Mun muitalin sidjiide buot maid Hearrá lei diktán mu oaidnit.