Esekiel

Jerusalem, gealbbohis viidnemuorra

¹ Munnje bođii dát Hearrá sátni: ² Olmmoš, mii buoretvuođaid viidnemuoras lea eará muoraid ektui, leago viidnemuorrasuorgi buoret go eará muorat? ³ Sáhttágo dan muoras ávnnastit juoidá, sáhttágo das duddjot návllige masa beassá heaŋggastit biergasiid? ⁴ Ja jos dat lea biddjojuvvon dollii ja dolla lea boaldán das goappáge geaži ja guosmudan gaskabáikki, de dohkkego dat mange duoji ávnnasin? ⁵ Iihan dat dohkken duodjeávnnasin dallege go dat lei ollis, vel uhcit dál, go dolla lea boaldán ja guosmudan dan. ⁶ Dan dihte cealká Hearrá Ipmil: Nugo viidnemuorra biddjojuvvo dollii oktan meahci muoraiguin, nu maiddái Jerusalema ássit. ⁷ Mun jorgalan muođuid sin vuostá, ja vaikko sii besset báhtarit dolas, de maŋimuš dolla loaktá sin. Go mun jorgalan muođuid sin vuostá, de dalle dii ipmirdehpet ahte mun lean Hearrá. ⁸ Mun dagan eatnama ávdimin, danin go sii leat leamaš oskkáldasmeahttumat, cealká Hearrá Ipmil.