Olbmo ovddasvástádus
1 Munnje bođii dát Hearrá sátni: 2 Manin dii atnibehtet dán sátnevádjasa Israelis:
Áhčit borre suvrra viidnemurjjiid,
mánáid bánit raššot.
3 Nu duohta go mun ealán, cealká Hearrá Ipmil, dii ehpet oaččo šat atnit dan sátnevádjasa Israelis. 4 Buohkaid eallin gullá munnje, sihke áhči ja bártni eallin gullá munnje. Dat gii sudduda, dat galgá jápmit.
5 Vuoigatlaš olmmái dahká dan mii lea riekta ja vuoigat. 6 Son ii doala oaffarmállásiid váriin iige bálval israellaččaid eahpeipmilgovaid. Son ii heahppášuhtte lagamuččas áhká iige veallá nissoniin dalle go nisson lea buhtismeahttun. 7 Son ii soardde guđege, muhto máhcaha velggolažžii pántta, son ii rievit guđege, muhto addá láibbi nealgeolbmui ja bivttasta dan gii lea álás. 8 Son ii lone reanttu vuostá iige váldde liigevuoittu. Son bissu guhkkin vearrivuođas, son dubme vuoigatlaččat olbmuid gaskkas. 9 Son doallá mu báhkkomiid ja doahttala mu lágaid ja dahká nugo lea riekta. Diekkár olmmái lea vanhurskkis, son oažžu eallit. Ná cealká Hearrá Ipmil.
10 Muhto dát vuoigatlaš olmmái sáhttá oažžut bártni gii šaddá veahkaválddálažžan ja olmmošgoddin ja rihkku báhkkomiid 11 maid áhčči ii goassege leat rihkkon. Son doallá oaffarmállásiid váriin dahje veallá lagamuččas áhkáin, 12 soardá vártnuheami ja váivváša, rievida olbmo iige máhcat pántta. Son bálvala eahpeipmilgovaid ja dahká fasttes daguid, 13 lone reanttu vuostá ja váldá liigevuoittu. Dakkár bárdni ii oaččo eallit. Son lea dahkan dáid fasttes daguid, son galgá ráŋggáštuvvot jápmimiin. Son lea ieš dasa sivalaš.
14 Muhto dát olmmái sáhttá oažžut bártni guhte oaidná buot suttuid maid su áhčči lea dahkan, ballá dain iige ieš daga seammá ládje. 15 Son ii doala oaffarmállásiid váriin iige bálval israellaččaid eahpeipmilgovaid, ii veallá lagamuččas áhkáin, 16 ii soardde guđege iige váldde pántta, ii rievit guđege muhto addá láibbi nealgeolbmui ja bivttasta dan gii lea álás. 17 Son doallá iežas guhkkin vearrivuođas, ii váldde reanttu iige liigevuoittu, muhto doallá mu lágaid ja doahttala mu báhkkomiid. Son ii galgga jápmit áhčis vearredaguid dihte, son oažžu eallit. 18 Muhto su áhčči lea soardán ja rievidan ja bargan vuoigatmeahttumit iežas olbmuid vuostá, ja danin son galgá jápmit vearredaguidis geažil. 19 Dii jearrabehtet: “Manne bárdni ii ráŋggáštuvvo áhčis suttuid geažil?” Danne go bárdni lea bargan riekta ja vuoigadit, son lea doahttalan buot mu báhkkomiid ja doallan daid, ja danin son oažžu eallit. 20 Muhto dat gii sudduda, galgá jápmit. Bárdni ii ráŋggáštuvvo áhčis suttuid dihte iige áhčči ráŋggáštuvvo bártnis suttuid dihte. Vanhurskkis oažžu iežas vanhurskkisvuođa mielde ja ipmilmeahttun oažžu iežas ipmilmeahttunvuođa mielde.
21 Jos ipmilmeahttun jorgala suttuinis ja doallá buot mu báhkkomiid ja dahká riekta ja vuoigadit, de son oažžu eallit, ii son jáme. 22 Buot su suttut leat vajáldahttojuvvon, ja son oažžu eallit daid vuoigatlaš daguid dihte maid lea dahkan. 23 Ná cealká Hearrá Ipmil: Dáhtošingo mun ipmilmeahttuma jápmima? Ingo mun baicce dáhto su jorgalit geainnuinis ja oažžut eallit? 24 Muhto jos vanhurskkis jorgala vanhurskkisvuođastis, jos son dahká vearrivuođa, seammá fastivuođaid maid ipmilmeahttun dahká, oažžugo son dalle eallit? Buot su vuoigatlaš dagut vajáldahttojuvvojit. Son galgá jápmit iežas oskkáldasmeahttunvuođa ja iežas suttuid dihte. 25 Muhto dii dadjabehtet: “Hearrá geaidnu ii leat vuoigat.” Gullet, israellaččat! Mu geaidnugo ii leat vuoigat? Almma din iežadet geainnut eai leat vuoigadat!
26 Muhto jos vuoigatlaš olmmoš jorgala vuoigatlašvuođastis ja dahká vearrivuođa, de son jápmá iežas vearredaguid dihte. 27 Jos ipmilmeahttun jorgala ipmilmeahttunvuođastis ja dahká dan mii lea riekta ja vuoigat, de son gádju iežas eallima. 28 Go son oaidná suttuidis ja jorgala dain, de son ii jáme, muhto oažžu eallit. 29 Ja goittotge israellaččat dadjet: “Hearrá geaidnu ii leat vuoigat.” Mungo in daga riekta, israellaččat? Almma dii ieža dahkabehtet dan mii lea vuoigatmeahttun?
30 Dan dihte mun dubmen din, israellaččat, juohkehačča su daguid mielde, cealká Hearrá Ipmil. Jorgalehket! Jorgalehket buot suttuineattet, vai mihkkege vearredaguid ii jorralahtáše din. 31 Suhppejehket alddádet buot vearredaguid maid lehpet dahkan! Ráhkadehket alcceseattet ođđa váimmu ja ođđa vuoiŋŋa. Manne dii jámášeiddet, israellaččat? 32 Mun in dáhto guđege jápmima, cealká Hearrá Ipmil. Jorgalehket, de dii oažžubehtet eallit!