Morašlávlla gonagassoga birra
1 Lávllo morašlávlaga Israela oaivámuččaid birra:
2 Ledjon lei du eadni!
Njiŋŋelas ledjon ledjoniid gaskkas.
Dat goarjadii nuorra ledjoniid gaskkas
ovttas čivggaidisguin.
3 Čivggainis muhtuma dat divššodii,
ja dat šattai gievrras ledjonin.
Dat oahpai rievidit stajádusa,
dat borai olbmuidnai.
4 Muhto álbmogat gohččojuvvojedje
dan vuostá,
ja dat darvvihuvvui sin bivdoroggái
ja dolvojuvvui njunnerieggás láidemiin
Egypta eatnamii.
5 Go ledjoneadni oinnii
ahte son lei vuordán duššás
ja buot su doaivu lei jávkan,
de dat válddii čivggainis nuppi
ja šaddadii dan.
6 Čivga jođašii ledjonvalvviin,
ja dat šattai gievrras ledjonin.
Dat oahpai rievidit stajádusa,
dat borai olbmuidnai.
7 Dat duššadii sin šloahtaid
ja heavahii sin gávpogiid.
Buot eatnama ássit doarggistedje,
go dat čearggui.
8 Muhto álbmogat gohččo čoahkkái
veagaideaset,
ja dan ovdii lebbejuvvui fierbmi,
dat darvvihuvvui sin bivdoroggái.
9 Dat oaččui čeabehii láhkkiid
ja njunnái rieggá,
ja dat dolvojuvvui Babylona gonagasa lusa
ja biddjojuvvui ladnái,
vai dan čeargun ii šat gulloše
Israela váriin.
10 Du eadni lei
dego gárddi viidnemuorra,
čáhcegáddái ceggejuvvon.
Dat lei suorgái ja šattolaš,
dashan lei valjis čáhci.
11 Dasa šadde váfes oavssit
ráđđensoabbin anolaččat,
dat čuzii balvvaid gaskii,
dat lei allat ja oidnui guhkás,
dan oavssit ledje lastát.
12 Muhto vašis dat rohttejuvvui luovus
ja bálkestuvvui eatnamii,
ja nuortabiegga goikadii dan murjjiid.
Dan váfes oavssit doddjojuvvojedje,
dat áste, ja dolla lovttii daid.
13 Dál viidnemuorra
lea ceggejuvvon meahccái,
jakŋá ja goiki eatnamii.
14 Dan ovssiin vulggii dolla
mii lovttii dan surggiid ja murjjiid.
Ii leat das šat váfes oaksi,
ii ráđđensoabbin anolaš muorra.
Dát lea morašlávlla, ja morašlávllan dat šattai.