Ohola ja Oholiba, oskkáldasmeahttun oappážat
1 Munnje bođii dát Hearrá sátni: 2 Olmmoš, de ledje guokte nissona, ovtta eatni nieiddat 3 geat furrošeigga juo nuorran Egyptas: Doppe olbmát čárvvodedje ja guldaledje sudno nieiddačiččiid. 4 Boarráseappo namma lei Ohola ja nuorabu Oholiba. Soai šattaiga mu oapmin ja riegádahtiiga bártniid ja nieiddaid. – Ohola lea Samaria, Oholiba lea Jerusalem.
5 Muhto vaikko Ohola lei mu, de son furrošii ain. Son cahkiidii ráhkisvuođas ráhkisteddjiidasas, assyrialaččaide, daidda soahteolbmáide 6 geaid gárvun ledje purpurbiktasat, daidda eatnanhearráide ja oaivámuččaide, fávrros nuorra olbmáide geat riidejedje heasttačielggis. 7 Sidjiide son gessui fuorrávuođastis, buot daidda Assyria válljobártniide. Son hipmudii sidjiide ja dagai iežas buhtismeahttumin buot sin eahpeipmilgovaiguin. 8 Son elii ain dan fuorráeallima maid lei álggahan Egyptas, gos olbmát ledje veallán suinna go son lei nuorra, čárvvodan su nieiddačiččiid ja furrošan suinna hipmošemiin. 9 Dan dihte mun adden su su ráhkisteddjiid, assyrialaččaid, gihtii, daid geaidda son hipmošii. 10 Sii nulle su álás, dolvo su bártniid ja nieiddaid ja godde su mihkiin. Nu sii ollašuhtte su duomu, ja su heajos beaggin šattai várrehussan buot nissoniidda.
11 Su oabbá Oholiba oinnii buot dan, muhto son hipmudii vel bahábut go Ohola ja furrošii vel vearrábut go son. 12 Son cahkiidii ráhkisvuođas assyrialaččaide. Sii ledje eatnanhearrát ja oaivámuččat, soahteolbmát geaid gárvun ledje hearvás biktasat, buohkat fávrros nuorra olbmát geat riidejedje heasttasealggis. 13 Mun oidnen mo son dagai iežas buhtismeahttumin – soai goappašagat meannudeigga seammá ládje. 14 Muhto Oholiba furrošii vel vearrábut. Son oinnii seainnis olbmágovaid, čuvgesruoksadiin sárgojuvvon Kaldea olbmáid. 15 Dain lei alimiid birra boagán ja oaivvis libardeaddji turbána, ja dain lei vovdnaolbmá ebmos neahku. Dat ledje Babylona bártnit, Kaldea eatnama olbmot. 16 Go son oinnii daid, de son dalán hipmošišgođii sidjiide. Son vuolggahii áirasiid Kaldeai, 17 ja babylonialaččat bohte su lusa su ráhkisvuođa oađđinsadjái ja dahke su buhtismeahttumin fuorrávuođaineaset. Muhto go son lei dahkan iežas buhtismeahttumin singuin, de su hipmu čáskkai. 18 Muhto go son lei rahpan salas sidjiide ja furrošan singuin albmosit, de son šattai munnje ilgadin, nugo su oabbáge lei šaddan. 19 Liikká son ain furrošii. Son muittii nuorravuođas beivviid go son furrošii Egyptas, 20 ja son hipmošišgođii Egypta fuorráolbmáide geain lei buoža nugo ásenis ja siema dego ores. 21 Don áibbašit iežat fuorás nuorravuođa, dan áiggi go Egypta olbmát čárvvodedje ja guldaledje du nieiddačiččiid.
22 Dan dihte, Oholiba, cealká Hearrá Ipmil: Mun bođđen du vuostá du ráhkisteddjiid geat dus leat leamaš ja geat šadde dutnje ilgadin. Mun buvttán sin juohke guovllus fallehit du: 23 Babylonialaččaid ja kaldealaččaid, Pekoda, Šoa ja Koa olbmáid ja velá buot assyrialaččaid, fávrros nuorra olbmáid, eatnanhearráid ja oaivámuččaid geat buohkat leat ebmos sáŋgárat ja vovdnasoahteolbmát, guđet buohkat riidejit heasttaiguin. 24 Ollu vovnnaiguin ja eatnat álbmogiiguin sii fallehit du juohke guovllus, vearjun guhkes ja jorba galbbat ja oaivvis ruovdegahpirat. Mun attán sidjiide válddi dubmet, ja sii dubmejit du iežaset lágaid mielde. 25 Mun divttán du dovdat mu balahahkesvuođa, divttán sin moari deaivat dutnje. Sii čuhppet dus njuni ja beljiid, ja dat geat leat báhcán, gahččet miehkkái. Sii dolvot du bártniid ja nieiddaid, ja dat geat leat báhcán, bullet dolas. 26 Sii nullet dus biktasiid ja váldet du hearvás čiŋaid. 27 Mun loahpahan dan nuoskivuođa ja furrošeami maid don álggahit juo Egyptas. Don it šat áibbaš ráhkisteddjiidat itge muittaš Egypta.
28 Ná cealká Hearrá Ipmil: Mun attán du daid gihtii geaid don fasttášat, daid gihtii geat šadde dutnje ilgadin. 29 Fasttášemiin sii fallehit du ja váldet buot mii dus lea, dassážii go don veallát áibbas álásin, du fuorás álásvuohta rabasin ja du nuoskkes furrošeapmi almmusin. 30 Nu geavvá dutnje danin go don vihket vierrásiid maŋis ja furrošit sin eahpeipmilgovaiguin.
31 Don leat vádjolan oappát geainnu, dan dihte mun attán du gihtii su geara. 32 Ná cealká Hearrá Ipmil:
Juga guorusin oappát geara,
čiekŋala ja stuorrá,
dat geassá ollu.
33 Don gárihuvat
ja šattat morrašii.
Hirpma ja gáfestusa gearra
lea oappát Samaria gearra.
34 Don galggat juhkat dan visot,
šluhpat dan botni ráje,
gáskit geara moallun
ja gaikkodit čiččiidat.
Mun lean sárdnon,
cealká Hearrá Ipmil.
35 Ná cealká Hearrá Ipmil: Don vajáldahttet mu, don jorgalit munnje selggiid. Dál don gárttat gillát iežat nuoskivuođa ja furrošeami čuovvumušaid.
36 Hearrá celkkii munnje: Olmmoš, dubme Ohola ja Oholiba ja dieđit sudnuide, makkár fastivuođaid soai leaba dahkan. 37 Soai leaba rihkkon náittosdili, ja sudno gieđat leat varranaga. Soai leaba furrošan eahpeipmiliiddiskaguin ja leaba velá oaffaruššan daidda biebmun mánáid geaid riegádahtiiga munnje. 38 Iige das vel galle: Soai dagaiga mu bassibáikki buhtismeahttumin ja eahpebasuhedje mu sabbahiid. 39 Go soai leigga goddán mánáideaskka eahpeipmiliidda, de seammá beaivvi soai bođiiga mu bassibáikái ja eahpebasuheigga dan. Ná soai dagaiga mu tempelis! 40 Soai vuolggaheigga velá áirasiid gáiddus eatnamiid olbmáid lusa, geat bohte go ožžo sáni. Sin geažil don ledjet basadan, vuoiddadan čalmmiid ja čiŋadan. 41 Don ledjet čohkánan seŋgii maid ledjet láhčán. Dan guoras lei lágiduvvon beavdi man ala don ledjet bidjan mu suovvasiid ja mu oljju. 42 Du birra gullui fuolahis olbmuid šlápma. Ollu earáid lassin doppe ledje olbmát geat ledje buktojuvvon meahcis. Sii bidje goappašiid nissoniid gieđaide giehtarieggáid ja oaivái hearvás kruvnnu. 43 Dalle mun dadjen dan šliitašuvvan fuorá birra: Dál sii furrošit suinna ja son singuin. 44 Olbmát bohte nugo lávejit boahtit fuorá lusa, nu sii bohte Ohola ja Oholiba, daid heahpatlaš nissoniid lusa.
45 Muhto vuoigatlaš olbmát dubmejit sudno nugo lávejit dubmet fuorránissoniid ja dakkár nissoniid geat sorbmejit olbmuid. Soaihan leaba rihkkon náittosdili, ja sudno gieđat leat varahuvvan.
46 Ná cealká Hearrá Ipmil: Čuoččáldahttos olmmošjoavku sudno vuostá, addojuvvoska soai hirbmii ja stajiduvvot. 47 Olmmošjoavku galgá geađgádit sudno ja illastit sudno mihkiin, goddit sudno bártniid ja nieiddaid ja boaldit sudno viesuid. 48 Mun loahpahan furrošeami eatnamis. Buot nissonat galget oahppat váldit vára, amaset furrošit dudno láhkái. 49 Doai šaddabeahtti vástidit furrošeamisteatte ja gillát ráŋggáštusa das ahte leahppi suddudan eahpeipmiliiddádeguin. Dalle doai ipmirdeahppi ahte mun lean Hearrá Ipmil.